भारतमा ‘आइफोन-१५’ उत्पादन सुरु

प्रविधि

गृहपृष्ठ
प्रविधि

भारतमा ‘आइफोन-१५’ उत्पादन सुरु

क्यापिटल नेपालसोमबार, भदौ ११, २०८०

काठमाडौं। छिमेकी भारतमा ‘आइफोन-१५’ उत्पादन सुरु भएको छ। अमेरिकी सूचना-प्रविधि कम्पनी एप्पलको साझेदार कम्पनी फक्सकनले भारतमा नयाँ आइफोन उत्पादन सुरु गरेको हो।

कम्पनीले तमिलनाडुस्थित श्रीपेरम्बुुदुरस्थित कारखानाबाट आइफोन-१५ उत्पादन थालेको हो। फक्सकन टेक्नोलोजी ग्रुपको श्रीपेरम्बुदूर प्लान्टले अहिले द्रुत गतिमा काम गरिरहेको छ।

चीनले आफ्ना कारखानाबाट पठाउन थालेको केही सातामै फक्सकनले पनि एप्पललाई आफूले उत्पादन गरेको आइफोन पठाउने तयारी गरेको छ।

टाइम्स अफ इन्डियाका अनुसार आगामी सेप्टेम्बर १२ देखि भारतमा बनेको आइफोन–१५ उपलब्ध हुने सम्भावना छ। एप्पलले पनि भारतमा उत्पादित आइफोन-१५ सकेसम्म चाँडो र धेरै मात्रामा लिने जनाइएको छ।

केही समयअघि एप्पलका प्रमुख कार्यकारी अधिकृत (सिइओ) टिम कुकले भारत भ्रमण गरेका थिए। त्यसबेला उनले भारतीय बजार र कारखानाहरू अध्ययन तथा अवलोकन गरेका थिए।

सन् २०२२ सेप्टेम्बरदेखि फक्सकनले भारतमा आइफोन-१४ एसेम्बल सुरु गरेको थियो। त्यो बेला विश्वव्यापीरूपमा नयाँ आइफोन सार्वजनिक भएको केही सातापछि नै भारतले एसेम्बल गर्न थालेको थियो।

प्रकाशित मिति: सोमबार, भदौ ११, २०८० ११:०६

प्रतिक्रिया दिनुहोस्