काठमाडौं। चालू आर्थिक वर्षको पहिलो महिना साउनमा आन्तरिक राजस्व संकलन लक्ष्यभन्दा न्यून भएको छ।
आन्तरिक राजस्व विभागले उपलब्ध गराएको विवरणअनुसार गत साउनमा लक्ष्यको ८२.३३ प्रतिशतमात्रै राजस्व संकलन भएको छ।
चालू आवको पहिलो महिनामा ४९ अर्ब ७० लाख रुपैयाँबराबर राजस्व संकलन गर्ने लक्ष्य लिइएकोमा ४० अर्ब ३४ करोड ४१ लाख रुपैयाँबराबर मात्रै संकलन भएको विभागले जनाएको छ। गत महिना आन्तरिक राजस्वतर्फका कुनै पनि कर शीर्षकमा सरकारी लक्ष्य भेटिएको छैन।
साउनमा १६ अर्ब ९ करोड १३ लाख ५६ हजार रुपैयाँबराबर आयकर संकलन गर्ने लक्ष्य राखिएकोमा १३ अर्ब २६ करोड ३६ लाख ६३ हजार रुपैयाँबराबर मात्रै संकलन भएको छ। आयकरतर्फ मासिक लक्ष्यमा वास्तविक प्राप्ति ८२.४३ प्रतिशत बराबर हो।
मूल्य अभिवृद्धि कर (भ्याट) पनि मासिक लक्ष्यको ८१.९७ प्रतिशतमात्रै उठेको छ। साउन महिनामा १४ अर्ब २४ लाख ७२ हजार रुपैयाँबराब भ्याट संकलन गर्ने लक्ष्य राखिएकोमा ११ अर्ब ४७ करोड ७८ लाख ५५ हजार रुपैयाँबराबर मात्रै उठेको देखिएको हो।
त्यस्तै, अन्तःशुल्कतर्फ १० अर्ब ६१ करोड ७१ लाख ४६ हजार रुपैयाँबराबर उठाउने लक्ष्य राखिएकोमा ७ अर्ब ७० करोड ९५ लाख ८९ हजार रुपैयाँबराबर उठेको छ। जुन लक्ष्यको ७२.६१ प्रतिशत हो।
घर बहाल कर र स्वास्थ्य सेवा कर पनि लक्ष्यभन्दा न्यून देखिँदा साउन महिनामा शिक्षा सेवा कर भने लक्ष्यभन्दा बढी देखिएको छ। पहिलो महिना घरबहाल करतर्फ मासिक लक्ष्यको ७१.५२ प्रतिशत अर्थात् २२ करोड २० लाख ६ हजार र स्वास्थ्य सेवा करतर्फ मासिक लक्ष्यको ६५.१ प्रतिशत अर्थात् ६५ करोड ७१ लाख ६३ हजार रुपैयाँबराबर उठेको छ।
शिक्षा सेवा कर भने मासिक लक्ष्यभन्दा बढी उठेको छ। साउनका लागि यो शीर्षकमा २० करोड ४५ लाख १ हजार रुपैयाँबराबर शिक्षा सेवा कर उठाउने सरकारको लक्ष्य रहेकोमा २८ करोड ९६ लाख १७ हजार रुपैयाँबराबर उठेको छ। जुन लक्ष्यभन्दा ४१.६२ प्रतिशत बिन्दुले बढी हो।
चालू आर्थिक वर्षको पहिलो महिनामा सरकारले उठाएको आन्तरिक राजस्व गत आर्थिक वर्षको सोही अवधिमा उठाएको भन्दा बढी हो। गत आर्थिक वर्ष साउनमा सरकारले ३९ अर्ब ८६ करोड ३४ लाख रुपैयाँबराबर आन्तरिक राजस्व उठाएको थियो।
गत आर्थिक वर्ष २०७९/८० का लागि सरकारले ६ खर्ब २६ अर्ब ६१ करोड रुपैयाँबराबर आन्तरिक राजस्व उठाउने लक्ष्य राखेकोमा ७६.५७ प्रतिशत अर्थात् ४ खर्ब ७९ अर्ब ७९ करोड रुपैयाँबराबर मात्रै संकलन भएको थियो।
चालू आर्थिक वर्षका लागि सरकारले ६ खर्ब ७७ अर्ब ७३ करोड रुपैयाँबराबर आन्तरिक राजस्व उठाउने लक्ष्य राखेको छ।
-1732541848.jpg)
