जुम्ला। जुम्लाको आन्तरिक राजस्व कार्यालयले गत आर्थिक वर्षमा ४७ करोड रुपैयाँ बढी राजस्व संकलन गरेको छ।
सदरमुकाम खलंगास्थित आन्तरिक राजस्व कार्यालयको आर्थिक वर्ष २०७९र८० मा वार्षिक राजस्व लक्ष्य ४७ करोड ५६ लाख रुपैयाँ रहेकामा ४७ करोड २६ लाख रुपैयाँ संकलन गरिएको कार्यालयका सूचना अधिकारी खेमराज उपाध्यायले जानकारी दिए।
उनका अनुसार यो लक्ष्यको ९९ दशमलव ४१ प्रतिशत हो।
‘यस कार्यालयको राजस्व संकलन अवस्था राम्रो रहेको छ,’ सूचना अधिकारी उपाध्यायले भने, ‘आव २०७८र७९ को तुलनामा ७ करोड रुपैयाँ बढी राजस्व संकलन भएको छ।’
विभिन्न शीर्षकबाट उक्त राजस्व संकलन भएको सूचना अधिकारी उपाध्यायको भनाइ थियो।
उनका अनुसार कार्यालयको कार्यक्षेत्रभित्र पर्ने माथिल्लो कर्णालीअन्तर्गत जुम्ला, कालिकोट र मुगुका गरी २५ हजार करदाता सङ्ख्या बढेका छन्।
१३ हजार व्यवसायी प्यानमा दर्ता भएका छन् भने करिब १२ हजार व्यक्तिगतरूपमा प्यानमा दर्ता भएका आन्तरिक राजस्व कार्यालय जुम्लाले जनाएको छ।
साउनमा चार करोड ५५ लाख राजस्व संकलन
आन्तरिक राजस्व कार्यालय जुम्लाले चालू आर्थिक वर्षको पहिलो महिनामा ४ करोड ५५ लाख रुपैयाँ राजस्व संकलन भएको जनाएको छ।
साउनमा ३ करोड ८६ लाख रुपैयाँ राजस्व उठाउने लक्ष्य रहेकामा राजस्व असुली ४ करोड ५५ लाख रुपैयाँ पुगेको कार्यालयका सूचना अधिकारी उपाध्यायले जानकारी दिए।
-1732541848.jpg)
