मध्यविन्दु। नवलपरासी (बर्दघाट सुस्तापूर्व) को शिख्रौलीबाट नारायणीमा पर्यटकका लागि डुंगा सफारी सञ्चालन गरिने भएको छ।
गैँडाकोट नगरपालिका–११ मा रहेको बगैँचा एडभेन्चर रिसोर्टले नारायणीको शिख्रौली घाटदेखि उत्तरी भंगालो हुँदै दिव्यपुरीसम्म करिब ११ किलोमिटरमा डुंगा सञ्चालन अनुमति पाएसँगै यहाँ आउने पर्यटकले नारायणी नदीमा डुंगा सफारीको आनन्द लिन पाउने भएका हुन्।
चितवन राष्ट्रिय निकुञ्जले बगैँचा एडभेन्चर रिसोर्टलाई यही भदौ १ गतेदेखि एक वर्षका लागि डुंगा सफारीको अनुमति दिएको रिसोर्टका सञ्चालक सन्तोष धितालले बताए।
‘रिसोर्टमा आउने पर्यटकलाई काठे गोरु गाडामा नारायणी नदीको शिख्रौली घाटसम्म र त्यहाँबाट करिब ११ किलोमिटर डुंगा सफारी गराएर दिव्यपुरीसम्म पुर्याइनेछ,’ उनले भने, ‘डुंगा सफारीपछि पर्यटकलाई दिव्य सामुदायिक वनमा जंगल सफारीसमेत गराउने गरेर प्याकेज तयार पारिएको छ।’
होटेल, घरबास तथा पर्यटन व्यवसायी समितिको साँझा पहलमा यस क्षेत्रमा डुंगा सफारी सञ्चालन गर्न लागिएको हो।
यसअघि होटेल, घरबास तथा पर्यटन व्यवसायी समितिको पहलमा देवचुलीको पिप्रहरबाट निकुञ्जको भित्री क्षेत्रमा करिब ५५ किलोमिटर लामो जंगल सफारी सुरु गरिएको छ।
वैदेशिक रोजगारीबाट फर्किएका व्यवसायी सन्तोष धितालले गैँडाकोट हर्कपुरमा करिब ८० करोड रुपैयाँ लगानीमा बगैँचा एडभेन्चर रिसोर्ट सञ्चालन गरेका हुन्।
‘निर्माणाधीन रिसोर्टलाई कार्ट हाउस (गाडा घर) भनेर चिनाउन खोजिएको छ,’ सञ्चालक धितालले भने, ‘वातानुकूलित यो होटलमा बाहिर र कोठाभित्रको तापक्रममा १२ डिग्री फरक हुने छ।’
यस्तो फरक शैलीको रिसोर्ट यो नै नेपालको पहिलो रहेको उनले दाबी गरे।
‘होटेलका सबै कोठाको माथिल्लो भागमा परम्परागत थारु समुदायले बनाउँदै आएको खपडाको छानो राखिएको छ,’ उनले भने।
होटेलमा बाँसको ढुङ्ग्रामा खाना पकाउने प्रविधि राखिएको छ। होटेलका पाहुनाले खाना खाने थाल, प्लेट, गिलाससमेत काठबाट नै तयार गरिएको उनले बताए।
‘होटेल पूर्णरूपमा सञ्चालनमा आउँदा ६० जनाले रोजगारी पाउने छन्,’ उनले भने, ‘यहाँ थारु र मगर समुदायको सांस्कृतिक कार्यक्रमसमेत प्रदर्शन गरिनेछ।
