काठमाडौं। काठमाडौं महानगरपालिकाले गत आर्थिक वर्ष २०७९/८० मा १० अर्ब २५ करोड ४१ लाख रुपैयाँ राजस्व असुल गरेको छ।
महानगरले गत आर्थिक वर्षका लागि १० अर्ब ४१ करोड रुपैयाँको लक्ष्य लिएको थियो। अघिल्लो आर्थिक वर्षभन्दा गत आर्थिक वर्षमा आन्तरिक राजस्व लक्ष्य अनुसार नै उठेपनि महानगरले संघ तथा प्रदेश सरकारबाट बाँडफाँट र अनुदानबाट आउने रकम कमी आउँदा समग्र राजस्व भने घटेको छ।
आर्थिक वर्ष २०७८/७९ मा महानगरले १० अर्ब ४१ करोड रुपैयाँ राजस्व असुल गरेको थियो। अनुदान रकम कम भए पनि अछिल्लो आर्थिक वर्षको तुलनामा आन्तरिक आम्दानी १ अर्ब ३६ करोड रुपैयाँ बढी असुल भएको कामपा राजस्व विभागका प्रमुख धुव्र काफ्लेले जानकारी दिए। उनका अनुसार महानगरले आन्तरिक आम्दानी लक्ष्यभन्दा ५७ करोड रुपैयाँ बढी असुल गरेको हो।
जसमा सबैभन्दा बढी बहाल करमा २ अर्ब ५६ करोड रुपैयाँ असुल भएको छ, त्यस्तै सम्पत्ती करमा १ अर्ब ८ करोड, व्यवसाय करमा पनि ५८ करोड रुपैयाँ असुल भएको विभागका प्रमुख काफ्लेले बताए।
त्यस्तै नक्शापास दस्तुरबाट १० करोड ११ लाख रुपैयाँभन्दा बढी राजस्व उठेको छ। स्रोतसाधनको हिसाबले सबैभन्दा बलियो महानगरले अघिल्लो वर्षको तुलनामा ३० प्रतिशतले बढी आन्तरिक राजस्व उठाएको हो।
आव २०७८/७९ मा जम्मा ४ अर्ब ४६ करोड आन्तरिक राजस्व उठाउन सफल भएको महानगरले आर्थिक वर्ष २०७९/८० मा ५ अर्ब ८२ करोड रुपैयाँ राजस्व उठाउन सफल छ।
कामपाले सम्पत्ति, घरजग्गा, बहाल, व्यवसाय मनोरञ्जनलगायत विभिन्न ३६ शीर्षकमा राजस्व असुल गर्दै आएको छ। अन्तर–सरकारी वित्त व्यवस्थापन ऐन, २०७४ मा मूल्य अभिवृद्धि कर तथा आन्तरिक अन्तः शुल्कबाट उठेको रकममध्ये ७० प्रतिशत केन्द्र सरकारलाई र १५/१५ प्रतिशत प्रदेश तथा स्थानीय तहलाई बाँडफाँट हुने व्यवस्था छ।
गत आर्थिक वर्षमा बाँडफाँटबाट कामपाले १ अर्ब ८५ करोड रुपैयाँ पाएको राजश्व विभाग प्रमुख काफ्लेले भने, ‘अघिल्लो वर्षको तुलनामा १ अर्ब ६८ करोड ९४ लाख रुपैयाँले कमी हो। अघिल्लो वर्ष करिब तीन अर्ब ५५ करोड रुपैयाँ प्राप्त गरेको थियो।’
-1732541848.jpg)
