काठमाडौं। दैनिक जीवनमा प्रयोग हुने सामग्रीको आयातमा ठूलो धनराशि खर्च भएको पाइएको छ।
सिन्दुर, टुथपेस्ट, कपाल स्याहारको सामग्री आयातमा ठूलो धनराशि विदेशिएको छ।
भन्सार विभागले सार्वजनिक गरेको विवरणअनुसार त्यस्ता सामग्रीको आयातका लागिमात्रै ठूलो परिमाणमा विदेशी मुद्रा खर्च भइरहेको छ।
विभागका अनुसार गत आर्थिक वर्षमा ‘नेइल पोलिस’ को आयातमा मात्रै ५ करोड २७ लाख १८ हजार रुपैयाँ बाहिरिएको छ।
त्यस्तै फेसक्रिम आयतमा ७८ करोड ५ लाख ८१ हजार रुपैयाँ विदेशिएको छ। त्यस्तै आर्थिक वर्ष २०७९/८० मा ४६ करोड ९ लाख ८९ हजार रुपैयाँ मूल्य बराबरको ‘बडी लोसन’ आयात भएको छ। यसबाट सरकारले २३ करोड ४ लाख ८३ हजार रुपैयाँ राजस्व संकलन गरेको छ।
एक करोडको सिन्दुर आयात
विशेष गरी हिन्दू महिलाले प्रयोग गर्ने सिन्दुरको आयातमा पनि ठूलो धनराशि खर्च भएको छ। पछिल्लो एक वर्षमा मुलुकमा १ करोड ५ लाख ६५ हजार रुपैयाँको सिन्दुर आयात भएको छ। गत आवमा सिन्दुर भारत र इन्डोनेसियाबाट आयात भएको छ।
३ अर्ब बढीको कपाल स्याहारका सामग्री आयात
विभागका अनुसार गत आवमा ३ अर्ब रुपैयाँभन्दा बढीको कपाल स्याहारका वस्तु आयात भएका छन्। कपालको स्याहारमा प्रयोग हुने स्याम्पु, तेल, क्रिम, रङलगायत वस्तु आयातमा उक्त धनराशि खर्च भएको हो।
गत आवमा ६३ करोड २१ लाख ३३ हजार मूल्यको स्याम्पु आयात भएको छ भने ६९ करोड ७७ लाख ७९ हजार मूल्यका कपालमा लगाउने तेल आयात भएको छ।
साथै, ७ करोड ३२ लाख ३८ हजार रुपैयाँबराबरको कपालमा लगाउने क्रिम आयात भएको छ।
त्यस्तै कन्डिसनर आयातमा १० करोड ४५ लाख ४७ रुपैयाँ हजार खर्च भएको छ। कपाल रङ्गाउने वस्तु आयातमा ६२ करोड २० लाख ८३ हजार रुपैयाँ बाहिरिएको देखिन्छ।
त्यस्तै, कपाल हेरचारका अन्य वस्तु आयातमा ९७ करोड ६१ लाख २० हजार रुपैयाँभन्दा बढी रकम विदेशिएको छ।
आँखा र ओठ शृङ्गारमा ५५ करोड
विभागका अनुसार गत आवमा ओठ र आँखा शृङ्गारका सामान आयातमा करोडौं बाहिरिएको छ।
गत आवमा मेकअपका सामान आयातमा ३६ करोड ४४ लाख ६० हजार रुपैयाँ बाहिरिएको छ। जसमा आँखा मेकअपका लागिमात्रै १९ करोड ४० लाख ८० रुपैयाँ खर्च भएको छ।
त्यस्तै अन्य शृङ्गारका सामग्री आयातमा ३ अर्ब १३ करोड रुपैयाँभन्दा बढी रकम मुलुकबाट बाहिरिएको छ।
७१ करोडको टुथपेस्ट
त्यस्तै विभागका अनुसार गत आवमा मुलुकमा ७१ करोड ३२ लाख ५८ हजार मूल्य बराबरको टुथपेस्ट (मञ्जन) आयात भएको छ। यस्तै, ५४ करोड ८४ लाख ८३ हजार रुपैयाँ मूल्य बराबरको मञ्जन निर्यात भएको छ।
पेन्सिल, मार्कर आयातमा १ अर्ब बाहिरियो
विवरण अनुसार गत आर्थिक वर्षमा १ अर्ब रुपैयाँभन्दा बढीको पेन, पेन्सिल, मार्कर तथा यसका वस्तु आयात भएका छन्। गत आवमा ५७ करोड ७६ लाख ९८ हजार रुपैयाँको वलपेन आयात भएको छ।
त्यस्तै १४ करोड ३८ लाखभन्दा बढीको पेन तथा मार्कर आयात भएको छ। विभागका अनुसार गत आवमा ५४ करोड ५१ लाखभन्दा बढीको पेन्सिल तथा पेन्सिलको लिड आयात भएका छन्। गत आवमा १ करोड ७२ लाखको पेनका निव, ३ करोड ७२ लाख रुपैयाँका पेनको रिफिल तथा मसी आयात भएको तथ्यांक छ।
पकेट लाइटर आयातमा ५२ करोड खर्च
गत आवमा ५२ करोड रुपैयाँभन्दा बढीको पकेट लाइटर आयात भएको छ। त्यसमा ४६ करोड ७२ लाख १५ हजार रुपैयाँको पुनः ग्यास भर्न नमिल्ने, १ करोड २३ लाख ९८ हजार रुपैयाँको ग्यास भर्न मिल्ने तथा अन्य लाइटर ५१ लाख ५५ हजार रुपैयाँको आयात भएको देखिन्छ।
६८ लाखको सेल्फी स्टिक आयात
विभागका अनुसार मोबाइलबाट फोटो खिच्न प्रयोग हुने विशेष प्रकारको लठ्ठी (सेल्फी स्टिक) आयातमा ६८ लाख ४४ हजार रुपैयाँ खर्च भएको छ भने २ करोड ५५ लाख २६ हजार रुपैयाँबराबरको ट्राइपड आयात भएको छ।
-1732541848.jpg)
