काठमाडौं। सूचनाको हकसम्बन्धी अभियानकर्मीले निवेदन दर्ता गर्दा कीर्तिपुर नगरपालिकाले टिकटवापत १० रुपैयाँ शुल्क लिएको जनाउँदै यसलाई सच्याउन माग गरेका छन्।
कानुनमा सूचना मागको निवेदन दर्ता गर्दा टिकट टाँस गर्नुनपर्ने र निवेदन दर्ताका लागि शुल्क पनि नलाग्ने व्यवस्था गरेको जनाइएको छ। कीर्तिपुर नगरपालिकाले सूचना माग गरेर निवेदन दर्ता गरेवापत टिकटको भनी १० रुपैयाँ शुल्क लिने गरेको सूचनाको हकका लागि राष्ट्रिय महासंघ जिल्ला कार्य समिति काठमाडौंका उपाध्यक्ष विनोद वस्नेतले बताए।
सूचनाको हकको निवेदन दर्ता गर्दा टिकट नचाहिने र तोक पनि लगाउनु नपर्ने कानुनी व्यवस्था छ भनी पटकपटक नगरपालिकाका सूचना अधिकारीलगायत कर्मचारीलाई स्मरण गराउँदा पनि टिकटवापतको शुल्क लिइरहेको उनले गुनासो गरे।
नगरपालिकाले भने नगरसभाको निर्णयअनुसार नै सूचना मागको निवेदन दर्ता गर्दा पनि १० रुपैयाँ टिकटवापत शुल्क लिइएको जनाएको छ। नगरपालिकाका प्रमुख प्रशासकीय अधिकृत लक्ष्मीप्रसाद बाँस्कोटा नगरसभाको निर्णय कर्मचारीले उल्लंघन गर्न नसक्ने भएकाले सूचना मागको निवेदन दर्ता गर्दा पनि शुल्क लिनुपरेको बताउँछन्।
नगरपालिकामा विसं २०७४ मा जन प्रतिनिधि निर्वाचित भएसँगै सबै प्रकारका निवेदन दर्ता गर्दा टिकटवापत १० रुपैयाँ दस्तुर लिने निर्णय गरिएको उनले जानकारी दिए। यो विषय आगामी नगरसभामा राख्ने गरी तयारी गरिएको नगरपालिकाले जनाएको छ।
यस विषयमा सूचनाको हकका लागि राष्ट्रिय महासंघको प्रतिनिधिमण्डलले नगरपालिकाको ध्यानाकर्षण गराएको जनाएको छ। सूचना मागको निवेदन दर्ता गर्दा टिकटवापत भनी शुल्क नलिन र सूचनाको हकको निवेदन दर्ताका लागि तोक लगाउने नाममा सूचना मागकर्तालाई निरुत्साहित नगर्न पनि अनुरोध गरिएको महांघका केन्द्रीय अध्यक्ष उमिद वागचन्दले बताए।
अन्य स्थानीय तहमा पनि सूचना मागको निवेदनमा टिकटवापत शुल्क लिने गरिएको भए महांघमा खबर गर्न उनले आग्रह समेत गरे।
-1732541848.jpg)
