काठमाडौं। सरकारले निर्यात प्रवर्द्धन लागि सहजीकरण गरिरहेको भए पनि निर्यात लगातार घट्दो छ।
आर्थिक वर्ष २०७९/८० मा नेपालको कूल निकासीमा २१.४ प्रतिशतले ह्रास आएको छ। गत आर्थिक वर्षमा १ खर्ब ५७ अर्बको वस्तु निकासी भएको उद्योग, वाणिज्य तथा आपूर्ति मन्त्रालयले जनाएको छ।
प्रतिनिधिसभा, उद्योग तथा वाणिज्य र श्रम तथा उपभोक्ता हित समितिको आजको बैठकमा वाणिज्य तथा आपूर्ति सचिव मधुकुमार मरासिनीले कूल पैठारीमा १६.१ प्रतिशतले ह्रास आएको जानकारी दिए।
आर्थिक वर्षमा १६ खर्ब ११ अर्बको वस्तु आयात भएको थियो। गत आर्थिक वर्षमामा नेपालको कूल वैदेशिक व्यापारमा पनि गिरावट आएको छ। उक्त आर्थिक वर्षमा कूल १७ खर्ब ८६ अर्ब रुपैयाँको वैदेशिक व्यापार भएको छ। यो अघिल्लो वर्षको सोही अवधिको तुलनामा १६.६ प्रतिशतले कमी हो।
‘गत आवको प्रारम्भिक तथ्यांकअनुसार कूल व्यापारमा ८.९ प्रतिशत निकासी ९१ प्रतिशत पैठारीको योगदान छ,’ उनले भने, ‘समीक्षा अवधिमा नेपालको कूल निकासी २१.४ प्रतिशतले ह्रास आएको छ।’
आर्थिक वर्ष २०७८/७९ मा निकारी पैठारी व्यापारको अनुपात १ः९.६ रहेकामा गत आर्थिक वर्षमा सो अनुपात १ः१० पुगेको सचिव मरासिनीले जानकारी दिए।
उनले व्यापार सन्तुलनका लागि व्यापार घाटा न्यूनीकरणसम्बन्धी राष्ट्रिय कार्ययोजना, २०७९ र नेपाल व्यापार एकीकृत रणनीति, २०८० को कार्यान्वयनका लागि सरोकारवाला निकायका सचिवसँग छलफल गरिएको बताए।
उद्योगमन्त्रीको अध्यक्षतामा बोर्ड अफ ट्रेडको बैठक सम्पन्न भई नेपालको निर्यात व्यापार प्रवर्द्धनका सम्बन्धमा महत्वपूर्ण निर्णय भएको उनले जानकारी दिए।
-1732541848.jpg)
