काठमाडौं। गत आर्थिक वर्ष २०७९/८० मा नेपालबाट ७८ करोड रुपैयाँबराबरको सिमेन्ट निर्यात भएको छ।
भन्सार विभागका अनुसार गत आर्थिक वर्षमा तीन सिमेन्ट उद्योगले ७७ करोड ९३ लाख ६ हजार रुपैयाँबराबरका १० लाख ४ हजार २३ टन सिमेन्ट निर्यात भएको छ।
विभागका अनुसार गत आर्थिक वर्षमा ३५ करोड ८९ लाख ५१ हजार रुपैयाँबराबरको ६ लाख ७ हजार ७३ मेट्रिक टन सिमेन्ट ४२ करोड ३ लाख ५५ हजार रुपैयाँ बरारबरका ३ लाख ९६ हजार ९५० मेट्रिक टन क्लिंकर निर्यात भएको छ।
हाल पाल्पा, अर्घाखाँची र बालाजी गरी तीन सिमेन्ट उद्योगले भारतमा सिमेन्ट निर्यात गरिरहेका छन्। साथै अन्य उद्योग निर्यातको तयारीमा छन्।
गत असार २४ गतेदेखि पाल्पा सिमेन्टको ‘तानसेन’ ब्रान्ड भारततर्फ निर्यात सुरु भएको थियो। साथै असोज ३१ गतेदेखि अर्घाखाँची र जेठ २९ गतेदेखि बालाजी सिमेन्टले ‘बाहुबली’ र ‘श्रृष्टी’ ब्रान्डमा पिपिसी सिमेन्ट निर्यात सुरु गरेका थिए।
सरकारले सिमेन्ट र स्टीललगायत सामान निर्यातमा आठ प्रतिशत अनुदान र वार्षिक १० करोड रुपैयाँभन्दा बढीको विद्युत खपत गर्ने उद्योगलाई दुईदेखि १५ प्रतिशतसम्म महसुलमा छुट दिने घोषणा गरेपछि नेपाली सिमेन्ट उद्योगीले निर्यात सुरु गरेका हुन्।
सरकारले गत आर्थिक वर्षको बजेटमा छुटको घोषणा गरेसँगै नेपाली तीन समेन्ट तथा एक स्टिल उद्योगले निर्यात गरेका हुन्। सिमेन्ट उत्पादक संघले भारत सरकारबाट सिमेन्ट निर्यातमा गुणस्तर प्रमाणपत्र पर्खाइमा धेरै सिमेन्ट उद्योग रहेको संघले जनाएको छ।
नेपाली सिमेन्ट उद्योगले भारत निर्यातका लागि भारत सरकारबाट गुणस्तरको प्रमाणपत्र लिनुपर्नेछ। नेपालमा सञ्चालित सिमेन्ट उद्योगसँग वार्षिक करिब २ करोड २० लाख टन सिमेन्ट उत्पादन क्षमता छ।
-1717671934-1727242094.jpg)
