काठमाडौं। चलचित्र विकास बोर्डले गत आर्थिक वर्ष २०७९/८० मा प्रदर्शन भएका स्वदेशी तथा विदेशी चलचित्रले गरेको कमाईको तथ्यांक सार्वजनिक गरेको छ।
उक्त तथ्यांकअनुसार स्वदेशी ५७ र विदेशी ७८ चलचित्र प्रदर्शन भएका छन्। स्वदेशी ५७ चलचित्र प्रदर्शन भएबापत ७६ करोड ७२ लाख ५७ हजार रुपैयाँको व्यापार भएको छ ।
स्वदेशी चलचित्रतर्फ सर्वाधिक व्यापार गर्न सफल चलचित्रको सूचीमा हेमराज विसीले निर्देशन गरेको ‘छक्का पञ्जा ४’ पहिलो स्थानमा छ। बोर्डको विवरणअनुसार ६ लाख २९ हजार ७ सय ५० टिकट बिक्री भएवापत ‘छक्का पञ्जा ४’ को १७ करोड ५२ लाख ९९ हजार १ सय ५९ रुपैयाँ ग्रस व्यापार भएको छ।
हास्यकलाकारको समूहले टेलिशृङ्खलामा पाइरहेको लोकप्रियतालाई ठूलो पर्दामा ल्याउन अभिनेता दीपकराज गिरीले ‘६ एकान ६’ मार्फत चलचित्र निर्माण सुरु गरेका थिए। त्यसपछि ‘वडा नम्बर ६’ हुँदै ‘छक्का पञ्जा’ निर्माण गरेको समूह अहिले यसकै शृङ्खलालाई अगाडि बढाइरहेको छ।
सर्वाधिक कमाई गर्ने दोस्रो स्थानमा उपेन्द्र सुब्बाले निर्देशन गरेको चलचित्र ‘जारी’ छ। शनिबार प्रदर्शनको सय दिन पूरा गर्ने चलचित्रको गत असार ३१ सम्म बोर्डको विवरणअनुसार ६ लाख १९ हजार २ सय २१ टिकट बिक्री भएवापत १७ करोड १७ लाख ९९ हजार १८ रुपैयाँ ग्रस व्यापार भएको छ।
सर्वाधिक कमाई गर्ने सूचीको तेस्रो स्थानमा सन्तोष सेन र छेतेन गुरुङले निर्देशन गरेको ‘प्रेमगीत ३’ रहेको छ। ‘प्रेम गीत’ को तेस्रो शृङ्खलाका रूपमा ‘प्रेम गीत ३’ नेपालीसँगै हिन्दी भाषामा प्रदर्शन भएको थियो। चलचित्रको नेपाली भाषामा २ लाख ६९ हजार ८ सय ८ टिकट बिक्री भएवापत ७ करोड ७० लाख ३५ हजार ५ सय ५८ र हिन्दी भाषामा ८३ हजार १ सय ६९ टिकट बिक्री भएवापत २ करोड २७ लाख २९ हजार ८ सय ६७ रुपैयाँको ग्रस व्यापार भएको छ।
चौथो नम्बरमा प्रदीप भट्टराईले लेखन तथा निर्देशन गरेको चलचित्र ‘महापुरुष’ रहेको छ। चलचित्रको २ लाख ४७ हजार ७ सय २८ टिकट बिक्री भएवापत ७ करोड ३८ लाख ९१ हजार ९ सय २० रुपैयाँको ग्रस व्यापार गरेको छ।
पाँचौँ स्थानमा रहेको दीपेन्द्र लामाले लेखन तथा निर्देशन गरेको चलचित्र ‘दुई नम्बरी’ को एक लाख ४१ हजार ७ सय १३ टिकट बिक्री भएवापत ३ करोड ८४ लाख ७५ हजार ७ सय ७० रुपैयाँको ग्रस व्यापार भएको छ।
यस्तै छैटौँ स्थानमा रहेको रामबाबु गुरुङले निर्देशन गरेको चलचित्र ‘फूलबारी’ को १लाख २६ हजार ५ सय ४९ टिकट बिक्री भएवापत ३ करोड ५३ लाख २० हजार ४ सय ७९ रुपैयाँको ग्रस व्यापार भएको छ।
सार्वजनिक विवरणमा सर्वाधिक व्यापार गर्ने सातौं स्थानमा रहेको ज्ञानेन्द्र देउजाले निर्माण तथा निर्देशन गरेको चलचित्र ‘झिङ्गेदाउ’ को १ लाख २२ हजार ३ सय २७ टिकट बिक्री भएबापत ३ करोड ४१ लाख १३ हजार २ सय २३ रुपैयाँ ग्रस व्यापार गरेको छ।
बोर्डले सार्वजनिक गरेको तथ्यांकले पनि दर्शकले स्वदेशी चलचित्रतर्फ मौलिक विषयवस्तुलाई रुचाएको प्रस्टिएको छ।
