काठमाडौं। सशस्त्र प्रहरी बल नेपालले गएको एक वर्षमा १ अर्ब २६ करोड ४४ लाख २४ हजार रुपैयाँको चोरी पैठारीका सामान बरामद गरी भन्सार कार्यालयमा दाखिला गरेको छ।
आर्थिक वर्ष २०७८/७९ कोभन्दा आर्थिक वर्ष २०७९/८० मा करिब २७ प्रतिशत बढीको भन्सार छलीका सामान बरामद गरिएको सशस्त्र प्रहरीले जनाएको छ।
उक्त अवधिभरि सशस्त्र प्रहरी बल नेपालका विभिन्न युनिटले साउनमा ९ करोड ७९ लाख, भदौमा ११ करोड २५ लाख, असोजमा ८ करोड ७४ लाख ९४ हजार, कार्तिकमा ६ करोड ९१ लाख ५८ हजार रुपैयाँबराबरको मालसामान बरामद गरेको सशस्त्र प्रहरीका प्रवक्ता सशस्त्र प्रहरी वरिष्ठ उपरीक्षक राजेन्द्र खड्काले जानकारी दिए।
उनका अनुसार मङ्सिरमा ८ करोड ४८ लाख, ५१ हजार, पुसमा १७ करोड ५८ लाख ५० हजार, माघमा ८ करोड १९ लाख ९६ हजार, फागुनमा ८ करोड ७९ लाख ६० हजार रुपैयाँको मालसामान बरामद भएको छ।
त्यस्तै, चैतमा ११ करोड १८ लाख ३० हजार, वैशाखमा १३ करोड ८१ लाख ८९, जेठमा ११ करोड ४३ लाख ६४ हजार र असारमा १० करोड २३ लाख १२ हजार रुपैयाँ बराबरको सामान बरामद गरी भन्सार कार्यालयमा बुझाएको प्रवक्ता खड्काले बताए।
आर्थिक वर्ष २०७९/८० मा सशस्त्र प्रहरी बल नेपालका बाहिनी मुख्यालयले उल्लेखित मूल्य बराबरको अवैध चोरी, निकासी बरामद, वन पैदावार, सुनचाँदी र अवैध रुपैयाँ बरामद गरी भन्सार दाखिला गरेको उनको भनाइ थियो।
सो अवधिमा नम्बर १ बराह बाहिनी मुख्यालय सुनसरीले २८ करोड ७३ लाख ४५ हजार, नम्बर २ छिन्नमस्ता बाहिनी मुख्यालय महोत्तरीले ६५ करोड, ७० लाख २६ हजार, नम्बर ३ गढीमाई बाहिनी मुख्यालय मकवानपुरले एक करोड ९० लाख ९९ हजार र नम्बर ४ मुक्तिनाथ बाहिनी मुख्यालय कास्कीले २ लाख ८१ हजार रुपैयाँबराबरको मालसामान भन्सारमा दाखिला गरेको हो।
त्यस्तै नम्बर ५ विन्ध्यवासिनी बाहिनी मुख्यालय रुपन्देहीले २२ करोड १६ लाख १५ हजार, नम्बर ७ वैद्यनाथ बाहिनी मुख्यालय कैलालीले ७ करोड ८३ लाख ४५ हजार रुपैयाँ भन्सार दाखिला गरेकोसमेत वरिष्ठ उपरीक्षक खड्काले जानकारी दिए।
-1732541848.jpg)
