मिटरब्याजसम्बन्धी विधेयक संसदद्वारा पारित

अर्थतन्त्र

गृहपृष्ठ
अर्थतन्त्र

मिटरब्याजसम्बन्धी विधेयक संसदद्वारा पारित

क्यापिटल नेपालआइतबार, असार ३१, २०८०

काठमाडौं। संघीय संसदले अनुचित लेनदेन (मिटरब्याज) सम्बन्धी विधेयक संशाेधनसहित सर्वसम्मतिले पारित गरेकाे छ।

संसदकाे आइतबार बसेकाे बैठकले `मुलुकी संहितासम्बन्धी केही नेपाल ऐन संशोधन गर्ने विधेयक–२०८०´ पारित गरेको हो।

संसदबाट सर्वसम्मतिले पारित भएकाे विधेयकमा कारोबार भएको वास्तविक रकम र कानुनअनुसार ब्याज दिलाउने संशोधन स्वीकार गरिएको छ।

याे विधेयक यसअघि राष्ट्रियसभाबाट पारित भइसकेको थियाे। अब फेरि राष्ट्रियसभामा पठाइने छ।प्रतिनिधिसभाले गरेको संशोधन राष्ट्रियसभाले स्वीकार गरेपछि प्रमाणीकरणका लागि राष्ट्रपतिकहाँ पठाइने छ।

राष्ट्रपतिले प्रमाणीकरण गरेपछि याे कानुन बन्ने छ मिटरब्याजलाई अनुचित लेनदेन मान्दै कानुनी कारबाही गर्ने बाटो खोलेर सरकारले गत वैशाख २० गते अध्यादेश ल्याएको थियो।

त्यसकाे केही दिनपछि त्यसलाई प्रतिस्थापन गर्ने विधेयक राष्ट्रियसभामा पेस भएकाे थियो। संवैधानिक र कानुनी व्यवस्थाअनुसार प्रतिस्थापन विधेयक असार २० भित्र पारित गरिसक्नुपर्ने कार्यसूची भए पनि प्रधानमन्त्री पुष्पकमल दाहाल को विवादास्पद अभिव्यक्तिलाई लिएर एमाले, राष्ट्रिय स्वतन्त्र पार्टी र राप्रपाले संसद अवरुद्ध गरेपछि अध्यादेश निष्क्रिय भएकाे थियाे।

प्रकाशित मिति: आइतबार, असार ३१, २०८० २२:०१

प्रतिक्रिया दिनुहोस्