सुर्खेत। कर्णाली प्रदेश सरकारको गौरवको आयोजना निर्माणाधीन प्रदेश रंगशालाको भौतिक प्रगति ६० प्रतिशत भएको छ।
प्रदेश खेलकुद विकास परिषद्ले सार्वजनिक गरेको तथ्यांकअनुसार भौतिक प्रगति ६० र वित्तीय प्रगति ४६ प्रतिशत भएको हो। हालसम्म रंगशालामा दर्शक प्यारापिटमा ४ हजार कुर्सी जडान कार्य सकिएको, भिआइपीतर्फ प्यारापिटमा सिभिल निर्माण कार्य अन्तिम चरणमा रहेको र छाना निर्माणकार्य बाँकी रहेको जनाइएको छ।
यस्तै रंगशालामा पौडी पोखरी, व्यावसायिक सटर तथा गेट निर्माण कार्य अन्तिमचरणमा रहेको र फुटबल मैदानमा दुबो लगाइ स्तरवृद्धि कार्य जारी रहेको छ। एथलेटिक्स ट्र्याकको सब बेस र नाली निर्माण सम्पन्न, रुख रोप्ने, हरियाली गर्ने कार्य जारी रहेको प्रदेश खेलकुद परिषद् सदस्य सचिव विश्वमित्र सञ्ज्यालले जानकारी दिए।
निर्माणाधीन रंगशाला कार्य तोकिएको समयभित्र सम्पन्न गर्ने गरी तालिकाअनुसार नै काम अगाडि बढेको र हालसम्म ६५ करोड ८५ लाख रकम खर्च भएको उनको भनाइ छ।
विसं २०८१ मङ्सिरमा कर्णाली प्रदेशमा आयोजना हुने १०औं राष्ट्रिय खेलकुद प्रतियोगिताका लागि रंगशाला निर्माण निरन्तर अगाडि बढाइएको सञ्ज्यालले जानकारी दिए।
राष्ट्रिय खेलकुद प्रतियोगितालाई लक्षित गरेर प्रदेशका विभिन्न जिल्लामा खेलकुद संरचना निर्माण गरिएको पनि उनले बताए। यस्तै १०औं राष्ट्रिय खेलकुदका लागि कर्णालीले दुई अंकको स्वर्ण पदकसहित उत्कृष्ट खेल प्रदर्शनीका लागि कर्णाली प्रदेश खेलकुद विकास परिषद्को १३औं बोर्ड बैठकले कर्णाली प्रदेशका खेललाई (क), (ख) र (ग) श्रेणीमा वर्गीकरण गरी प्रशिक्षण तथा प्रतियोगिता सञ्चालन गर्ने निर्णय गरेको छ।
यसैअनुसार (क) श्रेणीमा एथलेटिक्स, उसु आइटिफ कराते र तेक्वान्दो गरी पाँचवटा रहेका छन् भने (ख) श्रेणीमा सात वटा वक्सिङ, फुलकन्ट्याक्ट कराँते, जुडो, हक्की, रग्बी, हेन्डबल र बाँस्केटवल० रहेका छन्।
त्यसैगरी (ग) श्रेणीमा १० कवड्डी, डॉकेट, खोखो, ब्याडमिन्टन, भलिबल, भारोत्तोलन, फुटबल टिमको खेललाई वर्गीकरण गरिएको उनले जानकारी दिए। यी वर्गीकरण भर्खरै सम्पन्न भएको नवौं राष्ट्रिय खेलकुद प्रतियोगितालाई आधार मानी तयार गरिएको हो।
यस्तै खेलकुद परिषद्ले कर्णाली प्रदेशबाट विभिन्न अन्तर्राष्ट्रियस्तरका पदक प्राप्त गर्ने खेलाडीलाई पुरस्कारस्वरूप २७ लाख ५५ हजार रुपैयाँ खर्च गरेको छ।
