काठमाडौं। कोकाकोला नेपालले एटेलियर प्लेटफर्मसँगको सहकार्यमा युवा महिला उद्यमी एक्सेलेरेटर र मेन्टरशिप कार्यक्रम सफल कार्यान्वयन गरेको छ। यो कार्यक्रम कोकाकोला नेपालको महिला सशक्तिकरण कार्यक्रम ‘सक्षम’ को एक महत्वपूर्ण भाग भएको जनाइएको छ।
यसले नेपालमा महिलाद्वारा सञ्चालित स्टार्टअप र सम्भावित स्टार्टअपलाई व्यापक सहयोग र मार्गदर्शन प्रदान गर्ने उद्देश्य राखेको कम्पनीले जनाएको छ। जसले कोकाकोलाको मूल्य शृङ्खलाभन्दा बाहिर महिला सशक्तिकरण गर्ने प्रतिबद्धतालाई विस्तार गर्ने कम्पनीको भनाइ छ।
युवा महिला उद्यमी एक्सेलेटर र मेन्टरसिप कार्यक्रमले अप्रिल २०२३ मा आवेदन खोल्दा काठमाडौं, पोखरा र चितवनभरिका उत्साही महिला उद्यमीहरूबाट अत्यधिक प्रतिक्रिया प्राप्त भएको थियो।
आवेदकहरूबाट आठ फाइनलिस्टलाई उनीहरूको नवीनताको विचार र सफलता सम्भावनाको आधारमा छनोट गरिएको थियो। यी फाइनलिस्टमा केहिक्राफ्ट्सका वृन्दा दिवान, डुलुवा आउटडोर्सका मेनुका गुरुङ, साउथ एण्ड साउथ ईस्ट प्रोजेक्टका प्रकृति बस्याल, लर्नर्स रुमस्ः ए पाथ टु विजडमकी राशी महर्जन, सच्र्डकी रोजिना बराल, बाया–इन्जाइम्सकी सरला महर्जन, ग्रीनस्पेस नेपालकी शान्ति राई र स्वच्छ महिनावारीकी यजु महर्जन रहेका छन्।
कार्यक्रम सुरु गर्नका लागि, जुन ११, २०२३ मा एक ओरीयेण्टेसन सेसन आयोजित गरिएको थियो, जसले फाइनलिस्टहरुलाई आफ्नो यात्रामा बहुमूल्य अन्तर्दृष्टि प्रदान गर्यो। सहभागीहरूलाई त्यसबेलादेखि उनीहरूको उद्यमशीलताको प्रयासमा फस्टाउन र आवश्यक सीप र ज्ञानको साथ सुसज्जित गर्न एक्स्पर्ट सेसन आयोजना गरिएको छ । फाइनलिस्टहरूले सम्मानित स्पिकर र सल्लाहकारहरूको नेतृत्वमा सेसनमा भाग लिने अवसर पाएका छन्।
कोकाकोला कम्पनीका लागि नेपालका कन्ट्री डाइरेक्टर आदर्श अवस्थी भन्छन्, ‘यस कार्यक्रमले नेपालको गतिशील उद्यमशील परिदृश्यमा लैङ्गिक समानता र महिला सशक्तिकरणको लागि हाम्रो अटल समर्पणलाई जोड दिन्छ। यी महत्वाकांक्षी युवा महिला उद्यमीहरूलाई व्यापक सहयोग र मार्गदर्शन प्रदान गरेर, हामीले दिगो इकोसिस्टम सिर्जना गर्ने लक्ष्य राखेका छौं जसले उनीहरूको सफलतालाई मात्रै नभई नेपालको अर्थतन्त्रको समग्र विकासमा पनि महत्त्वपूर्ण योगदान पुर्याउँछ।’
कार्यक्रमको अवधिभरि, सहभागीहरूले नेपालका सफल महिला उद्यमीहरूसँग संलग्न हुने र सिक्ने अवसर पाएका छन्। वक्ता प्रसन्न बस्नेत (सहसंस्थापक, कटन मिल नेपाल), हौशाला थापा गुरुङ (हौशाला क्रिएटिभ्स), डा. मनु कार्की (इको साथी नेपाल), सुजाता श्रेष्ठ (घाघर र एम एन्ड एस) लगायतले युवा महिलाहरूलाई उनीहरूको उद्यमशील यात्रामा थप उत्प्रेरित र सशक्त बनाउँदै आ–आफ्ना प्रेरणादायी कथाहरू र अन्तर्दृष्टिहरू सेयर गरेका थिए।
लिङ्ग, नेतृत्व र जनस्वास्थ्य विज्ञ डा मधुरिमा भद्राको भनाइ छ, ‘मार्जिनलाइज्ड व्यक्तिहरू, विशेष गरी नन–बाइनरी व्यक्तिहरू र यौनकर्मीहरूका लागि सीमित अवसरहरू छन्,’ उनले भनिन्, ‘यी युवा महिलाहरू अहिलेबाट नै यो विशेष समूहको व्यक्तिहरूको बारेमा सोचिरहेका र एक समावेशी वातावरणमा उनीहरूका लागि अवसरहरू प्रदान गर्ने योजना गरिरहेका देखेर म धेरै उत्साहित छु।’
हप्तौंको गहन प्रशिक्षण र सल्लाहकारिता पछि, फाइनलिस्टहरू अन्तिम पिचको तयारीको अन्तिम चरणमा छन्। अगस्टमा उनीहरूका नवीन विचार र व्यापारिक योजना तीन कुशल एक्स्पर्ट सम्मिलित एक प्रतिष्ठित जूरी समक्ष प्रस्तुत गरिनेछ।
टप थ्री सहभागी प्रत्येकलाई एक लाख रुपैयाँ नगद पुरस्कार प्रदान गरिनेछ, जसले उनीहरूलाई आफ्नो उद्यमलाई गति दिन र लक्ष्यको नजिक पुग्न महत्त्वपूर्ण प्रोत्साहन प्रदान गर्ने जनाइएको छ।
‘युवा महिला उद्यमी एक्सेलेरेटर र मेन्टरसिप कार्यक्रमका सहभागीहरूले देखाएको उल्लेखनीय प्रगति र दृढ उत्साह देख्न पाउँदा हामी अविश्वसनीय रूपमा उत्साहित छौं । नेपालमा महिला सशक्तिकरण गर्ने हाम्रो प्रतिबद्धताले यस वर्ष यस कार्यक्रम मार्फत १ हजारं महिलाहरूलाई तालिम जारी राख्न प्रेरित गर्दछ। नेपाली महिलाहरूको पोटेन्सियल र रिसिलियेंसले हाम्रो विश्वासलाई सुदृढ बनाउँछ र हामी थप महिलाहरुका उद्यमशीलताको यात्रालाई तीव्रता दिन चाहन्छौ,’ बोटलर्स नेपालका म्यानेजिङ डाइरेक्टर दीपक सेन्थिल नाथले भने।
