पर्वत। अबिरल वर्षासँगै आएको पहिरोले कक्षाकोठा पुरिँदा यहाँको एक विद्यालयमा पठनपाठनमा समस्या भएको छ।
पर्वतको फलेवास नगरपालिका–२ को थापाठानामा आएको पहिरोले थापाठाना माध्यमिक विद्यालयको दुईवटा भवन पुरेपछि समस्या भएको हो।
असार १४ गते राति आएको अबिरल वर्षापछि गएको पहिराले विद्यालयको तीन–तीनकोठे दुईवटा भवनमा क्षति पुर्याएको विद्यालयका प्रधानाध्यापक विष्णु शर्माले जानकारी दिए। विद्यालय बिदा भएको समयमा पहिरो आएकाले मानवीय क्षति नभएको उनको भनाइ छ।
‘अबिरल वर्षासँगै विद्यालयमा माथिबाट पहिरो खस्यो, उक्त दिन बिदा भएका कारण मानवीय क्षति भएन,’ उनले भने। विद्यालयमा पहिराले क्षति पुर्याएसँगै कक्षाकोठाको अभाव भएको उनको भनाइ छ।
‘अहिले तत्कालका लागि केही गर्न सक्ने अवस्था छैन,’ उनले भने, ‘बर्खायाम भएकाले अझै क्षति हुने सम्भावना छ।’ उनले वर्षे बिदापछि कक्षा सञ्चालन हुने भएकाले वैकल्पिक कक्षाकोठाका लागि व्यवस्थापनमा समस्या हुने बताए।
विद्यालयले जग्गा अभावका कारण दुई ठाउँमा कक्षा सञ्चालन गरिरहेको छ। विद्यालयमा नर्सरीदेखि कक्षा ८ सम्मको आधारभूत तह सञ्चालन भइरहेको छ।
शर्माका अनुसार एउटा तीनकोठे भवन २०७५ सालमा ३१ लाख ५० हजार रुपैयाँमा निर्माण गरिएको हो भने अर्को भवन २०७६ सालमा १६ लाख २० हजार रुपैयाँमा २०७६ सालमा निर्माण गरिएको थियो।
ठेकेदारको लापरबाहीका कारण विद्यालयमा क्षति पुगेको स्थानीयको भनाइ छ। सडक निर्माणका क्रममा ठेकेदारले विद्यालयमाथि जथाभाब िमाटो फालेका कारण विद्यालयमा क्षति भएको स्थानीय अभिभावक राजेन्द्र क्षेत्रीको आरोप छ।
‘शुक्रबार बिहान १० बजे सडकमाथिबाट झरेको पहिराले नाली पुरियो। उक्त पानी नाली हुँदै ग्यावियनभित्र छिरेपछि पहिरो गएको हो,’ प्रत्यक्षदर्शी क्षेत्रीले भने, ‘ठेकेदारका कारण विद्यालयको भौतिक संरचनामा ठूलो क्षति भयो।’
सडक निर्माणका क्रममा ठेकेदारको लापरवाहीका कारण विद्यालयमा क्षति पुगेको अभिभावकको आरोप छ। विद्यालय व्यवस्थापन समितिका अध्यक्ष जितबहादुर थापा मगरले सडक निर्माणका क्रममा प्राविधिक त्रुटी भएको आशंका व्यक्त गरे।
सडक निर्माणका क्रममा हामीले ठेकेदार र प्राविधिकलाई विद्यालयमाथि माटो राख्दा समस्या हुन्छ भनेर बारबार अनुरोध गरेको भएपनि सुनुवाई नभएको उनको भनाइ छ। ‘अविरल बर्षसँगै आएको एक दिनको पानीले लाखौको क्षति बनायो,’ उनले भने, ‘तत्काललाई समस्या नभएपनि विद्यालय सञ्चालनका क्रममा विद्यार्थी कहाँ राख्ने भन्ने चिन्ताले सताउन थालेको छ।’
गत सोमबार फलेवास नगरपालिकाका नगरप्रमुख गंगाधर तिवारीले विद्यालयको स्थलगत निरिक्षण गरेका छन्। विद्यालयमा भएको क्षतिको विषयमा प्रहरी मुचुल्का बनाएर विभिन्न संघसंस्था हुँदै गृहमन्त्रालयमा पठाउने तिवारीले बताए।
विद्यालयको क्षति र समस्याका विषयमा तत्काल राहतका लागि पहल गर्नेसमेत तिवारीको भनाइ छ। विसं २०१३ सालमा स्थापना भएको विद्यालयमा हाल ४ सय ३८ जना विद्यार्थी छन्।
