रुपन्देही। लुम्बिनी प्रदेशमा पछिल्लो पाँच वर्षमा आठ सय ११ किलोमिटर सडक कालोपत्र गरिएको छ।
अर्थ मन्त्रालयले सार्वजनिक गरेको आर्थिक सर्वेक्षण अनुसार आर्थिक वर्ष २०७५/७६ देखि चालू वर्षसम्म सो परिमाणमा सडक कालोपत्र भएको हो। अर्थ मन्त्रालयले सार्वजनिक गरेको सर्वेक्षण अनुसार १ हजार ६८ किलोमिटर सडक ग्राभेल र १ हजार ९सय ६४ किलोमिटर सडक कच्ची छ।
प्रदेश सरकारले सडक सुरक्षालाई प्राथमिकतामा राखी सडक निर्माण, मर्मत र स्तरोन्नतिको काम अघि बढाएको प्रदेशका अर्थमन्त्री धनबहादुर मास्कीले बताए। उनका अनुसार कृषि सडक, पर्यटनस्थल एवं उद्योगस्थल पहुँच मार्ग, सीमा क्षेत्र सडक कार्यक्रम, प्रदेश गौरबका सडक तथा प्रदेशका प्रमुख राजमार्ग निर्माण एवं स्तरोन्नतिबाट ग्रामीण(सहरी आवद्धता र कृषि उत्पादन तथा बजारीकरणमा टेवा पुगेको छ।
लुम्बिनी प्रदेशका १२ वटै जिल्ला सदरमुकाम पक्की सडक सञ्जालले जोडिएका मन्त्री मास्कीले बताए। लुम्बिनीमा हालसम्म कच्ची, ग्राभेल र कालोपत्र गरी नौ हजार पाँच सय ९४ किलोमिटर सडक छ।
८९ मोटरेवल पुल
लुम्बिनीमा पछिल्लो वर्षमा ८९ मोटरेवल पुल निर्माण भएका छन्। त्यस्तै प्रदेशभरि २६ झोलुंगे पुल निर्माण भएका छन्। चालू आवमा मात्रै १७ मोटरेवल पुल र तीन झोलुंगे पुल निर्माण भएका छन्। लुम्बिनीमा चालू आवमा दुई सय ४८ मेगावाट विद्युत उत्पादन भएको छ। प्रदेशमा तीन हजार मेगावाट विद्युत उत्पादन क्षमता रहेको मन्त्री मास्कीले बताए।
त्यस्तै लुम्बिनीमा ९८।३२ प्रतिशत जनसङ्ख्या विद्युत पहुँचमा पुगिसकेका छन्। रोल्पा र रुकुम पूर्व सबैभन्दा कम विद्युतीकरण भएका जिल्ला हुन्। लुम्बिनीमा परम्परागत ऊर्जाको प्रयोग गर्ने जनसङ्ख्या ५६.४ प्रतिशत रहेको छ, भने अन्य वैकल्पिक स्रोत प्रयोग गर्ने ४३.६ प्रतिशत रहेका छन्।
