बैतडी। बैतडीका स्थानीय तहले आगामी आर्थिक वर्ष २०८०/८१ को लागि नीति तथा कार्यक्रम सहित बजेट सार्वजनिक गरेका छन्। नगरसभा तथा गाउँसभाबाट यहाँका स्थानीय तहको सार्वजनिक गरेको नीति तथा कार्यक्रम र बजेटमा सार्वजनिक गर्दै शिक्षा, स्वास्थ्य, कृषि, रोजगारलाई मुख्य प्राथमिकतामा राखेका छन्।
जिल्ला सदरमुकामस्थित दशरथचन्द नगरपालिकाले आगामी आवका लागि ८२ करोड १७ लाख ३८ हजार रुपैयाँबराबरको बजेट ल्याएको छ। उपप्रमुख कौशिला चन्दले आर्थिक विकास, भौतिक पूर्वाधार, सामाजिक विकास, सुशासनलगायतका क्षेत्रलाई प्राथमिकता राख्दै आगामी आवको बजेट नगरसभामा पेस गरेकी हुन्।
नगरपालिकाले पुँजीगततर्फ ११ करोड विनियोजन गरेको छ भने चालू खर्चतर्फ १३ करोड ४० लाख २८ हजार ८ सय ८९ रुपैयाँ बजेट विनियोजन गरेको छ। यस्तै आर्थिक विकासतर्फ ७५ लाख विनियोजन गरेको नगरपालिकाले सामाजिक विकासतर्फ ४ करोड ६० लाख, पूर्वाधार विकासतर्फ १ करोड ६६ लाख रुपैयाँ विनियोजन गरेको नगरपालिकाले वातावरण तथा विपद् व्यवस्थापनतर्फ ५० लाख रुपैयाँ विनियोजन गरेको छ।
पुर्चौडी नगरपालिकाले ६४ करोड ५४ लाख ११ हजार रुपैयाँ बजेट ल्याएको छ। पूर्वाधार, कृषि, शिक्षा र स्वास्थ्यलाई प्राथमिकतामा राखेर बजेट ल्याएको बताएको छ। नगरसभामा बजेट प्रस्तुत गर्दै उपप्रमुख मीना धानुकले सामाजिक विकास, पूर्वाधार, कृषि, शिक्षा स्वास्थ्यलाई र सुशासनलाई प्राथमकितामा राखेको बताइन्।
पुर्चौडीमा सामाजिक विकासतर्फ ८ करोड ५० लाख, वन वातावरण तथा विपद् व्यवस्थापनतर्फ ५० लाख, सुशासन तथा संस्थागत विकासतर्फ ९ करोड, पूर्वाधार विकासतर्फ ७ करोड र आर्थिक विकासतर्फ १ करोड रुपैयाँ विनियोजन गरिएको छ।
पाटन नगरपालिकाले पनि सार्वजनिक गरेको ६३ करोड ५३ लाख ६२ हजार २ सय १० रुपैयाँबराबरको बजेटमा शिक्षा, स्वास्थ्य र सामाजिक विकासलाई प्राथमिकतामा राखेको नगर प्रमुख गौरीसिंह रावलले बताइन्। दोगडाकेदार गाउँपालिकाका उपाध्यक्ष पार्वती कार्कीले प्रस्तुत गरेको ५१ करोड ४४ लाख ४० हजार ४ सयको बजेटमा स्वास्थ्य, कृषि र सुशासनलाई प्राथमिकतामा राखेको छ।
सिगास गाउँपालिकाले केही नयाँ कार्यक्रमसहित पुराना कार्यक्रमलाई निरन्तरता दिएर ४३ करोड ८२ लाख ३१ हजार ८ सय रुपैयाँबराबरको बजेट सार्वजनिक गरेको छ। जसमा चालूतर्फ ३३ करोड ८९ लाख २४ हजार ८ सय र पुँजीगततर्फ ९ करोड ९३ लाख ७ हजार रुपैयाँबराबरको बजेट विनियोजन गरिएको अध्यक्ष हरिसिंह धामीले बताए।
जिल्लाको पञ्चेश्वर गाउँपालिकाले ३८ करोड ७३ लाख ७२ हजार २ सय रुपैयाँबराबरको बजेट ल्याएको छ। कृषि, स्वास्थ्य र विद्युतीकरणलाई प्राथमिकतामा राख्दै बजेट गाउँसभामा पेस गरेको गाउँपालिका उपाध्यक्ष वीना भट्टले जानकारी दिइन्।
शिवनाथ गाउँपालिकाले पनि ३६ करोड ३४ लाख ६७ हजार ९ सय रुपैयाँको बजेट ल्याएको छ। बजेटमा शिक्षा, स्वास्थ्य, कृषिलाई प्राथमिकतामा राखिएको गाउँपालिका अध्यक्ष कर्णसिंह साउँदले बताए।
