काठमाडौं। अर्थमन्त्री डा. प्रकाशशरण महतले आन्तरिक कृषि उत्पादक किसानलाई संरक्षण गर्न आयातित वस्तुमा कर लगाइएको बताएका छन्।
बिहीबार अर्थ मन्त्रालयमा अर्थमन्त्रीलाई आयातित आलु, प्याज तरकारीमा कर लगाएर नेपालमा कृषि उत्पादन गर्न सहज वातावरण बनाएकोप्रति आभार प्रकट गर्न पुगेको नेपाल कृषि मेसिनरी व्यवसायी संघ, नेपाल व्यवसायी कृषक संघ, म नेपाली किसानलगायत कृषकसँगको सामूहिक भेटका क्रममा उनले यस्तो बताएका हुन्।
अर्थमन्त्री डा. महतले देशभित्र उत्पादन गरिरहेका उद्योगी, कृषकलाई संरक्षण गर्न उत्पादनको आधारमा अनुदान दिने सरकारको तयारी रहेको बताए। 'ज्येष्ठ १५ गते संसदमा प्रस्तुत आर्थिक विधेयकमा आलु प्याजमा लगाएको करको मुख्य उद्देश्य नै स्थानीय उत्पादनलाई नै प्रोत्साहन र संरक्षण गर्ने हो,' उनले भने, कृषिलगायत अन्य उत्पादक कृषिकलाई एक तहको संरक्षण दिनुपर्छ भन्ने मान्यताका साथ प्रस्तुत गरिएको हो।’ यो करको व्यवस्थाले मुलतः आयातित वस्तुलाई नै महँगो बनाउने, स्थानीय उत्पादनलाई महँगो नबनाउने उनले स्पष्ट पारे।
अहिले दैनिक उपभोग्य खाद्यवस्तु पनि आयात गर्नुपर्ने भन्ने बहस भइरहेको र त्यसमा आयातको सट्टा मुलुकभित्रै उत्पादन बढाएमा त्यसले रोजगारी सिर्जना हुने र उत्पादनकर्ता पनि उत्साहित हुने उनकाे भनाइ छ।
'पहिला कागज देखाएर मात्रै अनुदान लिएका थिए अब त्यसरी हुँदैन। उत्पादनमा नै अनुदान दिने हो। त्यसमा पनि नयाँ टेक्नोलोजी प्रयोग गरिरहेको छ। उत्पादनको आधारमा अनुदान दिने सरकारको तयारी छ,’ उनले भने।
अर्थमन्त्री महतले अहिले करको दर लागू नहुँदै सुनियोजित रूपमा केही संगठित व्यक्तिहले मूल्यवृद्धि गराएको बताए। उनले उत्पादनका आधारमा अनुदान दिने, गुरु किसान कार्यक्रमलगायतका विषयलाई बजेटले प्राथमिकतामा राखेको जानकारी दिए।
भेट क्रममा प्रतिनिधिहरूले आन्तरिक उत्पादनको संरक्षणको लागि अर्थमन्त्रीले चालेको कदम स्वागतयोग्य भएको भन्दै यस क्षेत्रमा देखिएका अन्य समस्याहरुको समाधान गर्नुपर्नेमा जोड दिएका थिए।
