जुम्लाका स्थानीय तहलाई २ अर्ब ३७ करोड विनियोजन

अर्थतन्त्र

गृहपृष्ठ
अर्थतन्त्र

जुम्लाका स्थानीय तहलाई २ अर्ब ३७ करोड विनियोजन

क्यापिटल नेपालसोमबार, जेठ २९, २०८०

जुम्ला। जुम्लाका आठ स्थानीय तहका लागि संघीय सरकारले चालू तथा पुँजीगत खर्चतर्फ दुई अर्ब ३७ करोड रुपैयाँ बढी रकम विनियोजन गरेको छ।

आर्थिक वर्ष २०८०/८१ को वित्तीय हस्तान्तरणमा उल्लेख भएअनुसार आगामी आर्थिक वर्षका लागि यहाँका स्थानीय तहलाई दुई अर्ब ३७ करोड २२ लाख रुपैयाँ रकम विनियोजन गरिएको हो।

विनियोजित रकममध्ये चन्दननाथ नगरपालिकाका लागि ३८ करोड ५४ लाख रकम विनियोजन गरिएको छ। सात गाउँपालिकामध्ये सबै भन्दा बढी तिला गाउँपालिकाका लागि ३१ करोड ९० लाख र सबै भन्दा कम गुठिचौर गाउँपालिकालाई २१ करोड ६६ लाख विनियोजन गरिएको वित्तीय हस्तान्तरणमा उल्लेख गरिएको छ।

त्यस्तै, तातोपानी गाउँपालिकालाई ३१ करोड पाँच लाख, कनकासुन्दरी गाउँपालिकालाई २९ करोड ३६ लाख, हिमा गाउँपालिकालाई २९ करोड ७१ लाख, पातारासी गाउँपालिकालाई २६ करोड ८१ लाख र सिञ्जा गाउँपालिकालालाई २८ करोड १९ लाख रुपैयाँ विनियोजन गरिएको अर्थ मन्त्रालयको तथ्यांकमा उल्लेख छ।

संघीय सरकारले वार्षिक बजेटमा समावेश गरी स्थानीय तहलाई समानीकरण अनुदान, सशर्त अनुदान, विशेष अनुदान तथा समपुरक अनुदान शीर्षकमा चालू र पुँजीगत खर्चका लागि अनुदान रकम उपलब्ध गराउने गर्छ।

प्रकाशित मिति: सोमबार, जेठ २९, २०८० १५:१५

प्रतिक्रिया दिनुहोस्