बजेट २०८०/८१

कच्चापदार्थ बोकेर आउने ट्रकले ४८ घन्टाभित्र सामान बोकेर गए पटके शुल्क मिनाहा

काठमाडौं। विदेशबाट कच्चापदार्थ बोकेर आउने ट्रकले ४८ घन्टाभित्र नेपालबाट सामान बोकेर गए पटके शुल्क नलाग्ने व्यवस्था गरिएको छ।

सरकारले आगामी आर्थिक वर्षको बजेटमार्फत उद्योगमा कच्चापदार्थ बोकेर आएका ट्रकले नेपालबाट सामान बोकेर गएको अवस्थामा पटके शुल्क लाग्ने व्यवस्था हटाएको हो।

सरकारले निर्यात वृद्धि गर्न अनेक उपायमाथि निरन्तर छलफल गरिरहेको थियो। नेपालका उद्योगको प्रतिस्पर्धी क्षमता विकास गर्न, उत्पादकत्व बढाउन सरकारले पटके शुल्क हटाएर निर्यातलाई बढावा दिएको उद्योगी पशुपति मुरारका बताउँछन्।

भारतसहित तेस्रो मुलुकबाट कच्चापदार्थ बोकेर उद्योगमा आइपुगेका गाडीमा नेपालको उत्पादन निर्यात गर्दा सरकारले प्रतिट्रक २ हजार ५ सय रुपैयाँ भन्सार लिने गरेको थियो। अब त्यस्तो शुल्क मिनाहा भएको उद्योगी मुरारकाले बताए।

‘कच्चापदार्थ खन्याएर ट्रक रित्तै पठाउँदा कुनै भन्सार नलाग्ने, त्यही ट्रकमा सामान लोड गरेर निर्यात गर्दा शुल्क लाग्थ्यो,’ उनले भने। सरकारको उक्त नीतिले सिमेन्ट तथा स्टिल उत्पादन भारत निर्यात गर्न थप सहज बनेको छ।