वर्ल्डलिंक र डिसहोमबीच ग्राहक थप्ने होडबाजी, टेलिकमले एक महिनामै ३ हजार गुमायो

प्रविधि

गृहपृष्ठ
प्रविधि

वर्ल्डलिंक र डिसहोमबीच ग्राहक थप्ने होडबाजी, टेलिकमले एक महिनामै ३ हजार गुमायो

क्यापिटल नेपालआइतबार, चैत १२, २०७९

काठमाडौं। नेपाल टेलिकमले एक महिनाको अवधिमा तीन हजार ३ सय २९ ग्राहक गुमाएको छ।
नेपाल दूरसञ्चार प्राधिकरणले सार्वजनिक गरेको एमआईएस रिपोर्टअनुसार मंसिरदेखि पुससम्मको एक महिनामा टेलिकमले तीन हजार ३ सय २९ ग्राहक गुमाएको हो।

रिपोर्टअनुसार २ लाख ८९ हजार ४ सय ६५ ग्राहक रहेको टेलिकमको एक महिनाको अवधिमा ग्राहक संख्या घटेर २ लाख ८६ हजार १ सय ३६ मा सीमित भएको छ। यो सँगै एक वर्षको अवधिमा नेपाल टेलिकम छोड्ने ग्राहकको संख्या २३ हजार ४ सय १८ पुगेको छ।
त्यस्तै यो अवधिमा वर्ल्डलिंकले सबैभन्दा धेरै ग्राहक थपेको छ। यसअघि ७ लाख १७ हजार १ सय ५० ग्राहक संख्या रहेको वर्ल्डलिंकले एक महिनाको अवधिमा १२ हजार ६ सय २३ नयाँ ग्राहक थप्दै आफ्नो ग्राहकसंख्या ७ लाख २९ हजार ७ सय ७३ पुराएको छ।

त्यस्तै एक महिनाको अवधिमा अर्को कम्पनी डिसहोमले १२ हजार ४ सय ४५ नयाँ ग्राहक थपेको छ। यसअघि १ लाख ९५ हजार २ सय ९५ ग्राहकसंख्या रहेको डिसहोमले एक महिनामा सो संख्या बढाएर २ लाख ७ हजार ७ सय ४० पुर्याएको छ।

रिपोर्टअनुसार यो एक महिनाको अवधिमा वेबसर्फरले ११ हजार २ सय १९, भायानेटले ४ हजार ८ सय १२, क्लासिक टेकले ३ हजार ७ सय ३३, सीजीले १ हजार ९ सय ९० र अन्यले २ हजार ५ नयाँ ग्राहक थपेका छन्।

प्राधिकरणकाअनुसार एक महिनामा इन्टरनेट ग्राहकको संख्या ४७ हजार ७ सय ९७ थपिएको छ। यो सँगै नेपालमा कुल इन्टरनेट ग्राहकको संख्या २५ लाख ३० हजार ९ सय ७६ पुगेको छ।

प्रकाशित मिति: आइतबार, चैत १२, २०७९ १४:२६

प्रतिक्रिया दिनुहोस्