काठमाडौं। ६२ वर्षको अवधिमा उद्योग क्षेत्रमा मात्रै करिब २८ खर्ब रुपैयाँ लगानी भएको छ। उद्योग विभागले सार्वजनिक गरेको तथ्यांकअनुसार चालू आर्थिक वर्षको फागुन मसान्तसम्म (विभिन्न क्षेत्रका उद्योगमा) निजी क्षेत्रबाट २७ खर्ब ८२ अर्ब रूपैयाँबराबरको लगानी प्रस्ताव भएको हो।
आर्थिक वर्ष २०१७/१८ सालदेखि २०७९/८० सम्म ९ हजार ९ सय ७४ उद्योगका लागि उक्त लगानी प्रस्ताव भएको हो। उक्त तथ्यांकअनुसार हालसम्म दर्ता भएका उद्योगमध्ये सबैभन्दा धेरै लगानी प्रस्ताव साना उद्योगमा रहेको छ।
तथ्यांकअनुसार हालसम्म दर्ता भएका उद्योगले ६ लाख ७० हजार दुई सय ५५ जनालाई रोजगारी उपलब्ध गराएको उल्लेख छ।
आठ महिनामा साढे एक खर्बको प्रतिबद्धता
विभागले सार्वजनिक गरेको चालु आर्थिक वर्षको आठ महिना (गत साउनदेखि फागुन मसान्तसम्म) को तथ्यांकअनुसार स्वदेशी र विदेशी लगानीका एक सय ८३ वटा उद्योगका लागि एक खर्ब ५५ अर्ब रुर्पैयाँ बराबरको विदेशी लगानी प्रतिबद्धता आएको छ।
यस्तै, आठ महिनाको अवधिमा दुई सय ३९ विदेशी लगानीका उद्योगका लागि ३१ अर्ब २१ करोड ११ लाख ३२ हजार एक सय ९६ रूपैयाँ लगानी प्रतिबद्धता आएको छ । जसमा फागुनमा मात्रै ३ अर्ब ४४ करोड ९८ लाख ३८ हजार छ सय विदेशी लगानी प्रतिबद्धता भित्रिएकोे छ ।
विभागका अनुसार चालु आर्थिक वर्षको साउनमा मात्र २ अर्ब ६४ करोड नौ लाख, भदौमा ३ अर्ब ४४ करोड ६५ लाख, असोजमा १ अर्ब ८५ करोड ४७ लाख र कात्तिकमा ३ अर्ब ६५ करोड रूपैयाँबराबरको लगानी प्रतिबद्धता आएको थियो।
यस्तैगरी मंसिरमा ८० करोड आठ लाख, पुस महिनामा ४ अर्ब ८५ करोड २० लाख, माघ महिनामा १ अर्ब ३९ करोड रूपैयाँ बराबरको वैदेशिक लगानी प्रतिबद्धता आएको छ।
विभागको तथ्यांकअनुसार गत आर्थिक वर्ष २०७८/०७९ को साउनमा पाँच अर्ब ५३ करोड ५० लाख रूपैयाँ, भदौमा ६ अर्ब ३२ करोड, असोजमा ११ अर्ब ९६ करोड पाँच लाख, कात्तिकमा ९८ करोड, मंसिरमा ५ अर्ब १५ करोड ५१ लाख, पुसमा ६१ करोड २० लाख रूपैयाँ, माघमा ५३ करोड ९५ लाख र फागुनमा २ अर्ब २३ करोड रूपैयाँ बराबरको लगानी प्रतिबद्धता आएको थियो।
साढे १३ अर्ब नाफा विदेशीयो
चालु आर्थिक वर्षको आठ महिनाको अवधिमा झण्डै साढे १३ अर्ब नेपाली विदेशीएको छ । उद्योग विभागले सार्वजनिक गरेको आठ महिनाको तथ्यांकअनुसार १३ अर्ब ४५ करोड ९८ लाख ७८ हजार तीन सय २४ रूपैयाँ लाभांशवापत रकम फिर्ताको सिफारिस भएको हो ।
विभागले आठ महिनामा रोयल्टीवापत २ अर्ब ८ करोड ९३ लाख ९७ हजार १०७ नेपाली रुपैयाँ, ११ लाख ४८ हजार सात ६० अमेरिकी डलर, ३० करोड ४७ लाख ५० हजार ८२५ भारतीय रुपैयाँ र ७ हजार युरो विदेश लैजानका लागि विभागले सिफारिस गरेको छ।
विभागले सिफारिस गरेपछि नेपाल राष्ट्र बैंकबाट स्वीकृत लिएपछि मात्र नेपाली रुपैयाँ विदेश लैजान पाइन्छ । विभागले स्वीकृत गरेको १५ दिनभित्र रकम लैजान पाइने विभागले जनाएको छ। रासस
