काठमाडाैं। प्रधानमन्त्री पुष्पकमल दाहाल 'प्रचण्ड'ले नेपालको पूर्वाधार क्षेत्रमा चिनियाँ लगानीको अपेक्षा रहेको बताएका छन्।
प्रधानमन्त्री दाहालले पूर्वाधार विस्तारमा चिनियाँ सहयोग रहँदै आएको बताउँदै अति कम विकसित राष्ट्रबाट नेपाल स्तरोनन्ति हुँदै गरेको सन्दर्भमा पूर्वाधार विस्तारको आवश्यकता रहेको बताए।
नेपाल उद्योग परिसंघ (सिएनआई) र चाइना काउन्सिल फर प्रमोसन अफ इन्टरनेसनल ट्रेडले मंगलबार आयोजना गरेको नेपाल चाइना बिजनेस फोरममा उनले यस्तो बताएका हुन् ।
प्रधानमन्त्री दाहालले चीन नेपालक लागि दोस्रो ठूलो व्यापार साझेदार र प्रत्यक्ष वैदेशिक लगानी प्रतिवद्धतामा पहिलो राष्ट्र रहेको भन्दै नेपाल चीनको आर्थिक सम्बन्ध थप मजबुत बनाउनुपर्ने बताए।
नेपालमा लगानी विस्तार गर्नका लागि चिनियाँ लगानीकर्तालाई प्रधानमन्त्री दाहालले आग्रह गरेका छन्। उनले सरकारले लगानीलाई प्रोत्साहन गरेको, लगानीमैत्री काननुनहरू रहेको बताए। नेपालमा लगानी गर्नसमेत उनले आग्रह गरे। ऊर्जा, उत्पादनमूलक उद्योग तथा खानी क्षेत्रमा लगानी गरेर लाभ उठाउन सक्ने प्रधानमन्त्री दाहालले उल्लेख गरेका छन्।
नेपालमा नीतिगत र राजनीतिक स्थिरता कायम हुने उनले बताए। व्यवसायमा लाभांशको दर राम्रो छ,’ उनले दाबी गरे। प्रधानमन्त्री दाहालले नेपालले विदेशी लगानीमा थप सुधार गरेको बताए। नेपाल-चीन क्रसबोर्डर 'इकोनोमिक जोन' बनाउन दुई देशबीच छलफल भइरहेको, रेलवे लाइन जोड्न काम भइरहेको बताए।
नेपालका लागि चिनियाँ राजदूत छन् सोङले चीन नेपालको सबैभन्दा ठूलो विदेशी लगानी पठाउने मुलुक भएको बताए। चिनियाँ प्रधानमन्त्रीले चीनले सुधारलाई अझै गहिरो बनाउँदै गरेको र थप खुला बनाउने उल्लेख गरे।
नेपाल उद्योग परिसंघका अध्यक्ष विष्णु अग्रवालले नेपालमा चिनियाँ लगानी र सरकारको सहयोगले नेपालको विकासमा महत्वपूर्ण रहेको बताए। पूर्वाधारमा चीनको लगानी निकै महत्वपूर्ण भएको पनि उनले बताए।
सिसीपीआइटीका उपाध्यक्ष झाङ साओगाङले दुई मुलुकबीचको व्यापार र लगानीको वातावरण अझै गहिरो बनाउनुपर्ने उनले बताए।
