काठमाडौं। कोका–कोलाले आफ्नो सक्षम तालिम कार्यक्रम सम्पन्न गरेको छ। खुद्रा व्यवसाय तथा साना रेस्टुरेन्टहरु सञ्चालन गर्ने महिला व्यवसायीहरुको सीप विकास गर्न तथा सशक्तीकरण गर्ने उद्देश्यले कम्पनीले सञ्चालन गरेको कार्यक्रमबाट १ हजारभन्दा बढी महिलालाई तालिम प्रदान गरिएको छ ।
गत ८ मार्च २०२२ गते अन्तर्राष्ट्रिय नारी दिवसको अवसर पारेर कोका–कोलाले आफ्नो बोटलिङ पार्ट्नर बोट्लर्स नेपालसँग मिलेर सक्षम कार्यक्रमको सुरुवात गरेको थियो । खुद्रा व्यवसाय र साना रेस्टुरेन्टहरु सञ्चालन गर्ने महिलाहरुलाई वित्तीय साक्षरता, हस्पिटालिटी, स्यानिटेसन म्यानेजमेन्ट र डिजिटल वालेटको प्रयोग सम्बन्धि तालिम दिनको लागि उक्त कार्यक्रम सञ्चालन गरिएको थियो । प्रदेश १, २, ३ र ४ का मुख्य सहरहरुमा एक–एक दिन गरी यो कार्यक्रम सञ्चालन गरिएको थियो ।
साे कार्यक्रममा सहभागी सौरहाकी गीता श्रेष्ठले भनिन्, “महिला युवा व्यवसायीहरुका लागि सक्षम तालिम कार्यक्रम अत्यन्तै उत्साहजनक रहेको थियो । मैले आजभन्दा ४४ वर्ष अगाडि जम्मा १६० रुपैयाँमा आफ्नो व्यापार सुरु गरेको थिएँ । मेरो कडा परिश्रमले मैले आफ्नो सपना पूरा गर्न सक्षम भएको छु । अहिले मेरो २ वटा घर र एउटा पसल छ र एकल महिलाको रुपमा आफ्नो परिवारलाई सहयोग गर्न सकेको छु ।”
त्यस्तै नारायणघाटकी माया पाण्डेले भनिन्, “सक्षम कार्यक्रमले हामीलाई आर्थिक रूपमा सशक्त हुन चाहिने सीपहरु सिकाउनुको साथ साथै हाम्रो सन्जाल विस्तार गर्ने अवसर पनि दिएको छ । सक्षम जस्तो सिप बिकास गर्ने कार्यक्रमले हामीलाई अझै राम्रोसँग व्यवसा सन्चालन गर्न हौसला दिएको छ ।”
कोका–कोला नेपालका कन्ट्री डिरेक्टर आदर्श अवस्थीले महिला सशक्तीकरणमा आफूहरुको जोड रहेको बताए । उनले भने, ‘कोका–कोला बेटर शेयर्ड फुचरमा विश्वास गर्छ र महिला सशक्तीकरण जहिले पनि हाम्रो मुल मान्यताका रूपमा रहेको छ । हामीले सक्षम तालिम कार्यक्रम २०२२ मा सुरु गरेका थियौं । जसमा हामीले अनुभवी र दक्ष प्रशिक्षकहरुसँग मिलेर महिला व्यवसायीहरुलाई व्यावसायीक तालिम, मेन्टोरिङ्ग नेट्वर्क, आर्थिक सेवा तथा अन्य विभिन्न तालिमहरु दिएका थियौं ।'
जसले गर्दा उहाँँहरुलाई आफ्नो जीवनस्तर उकास्न, परिवारलाई सहयोग गर्न र समुदायमा पनि सकारात्मक परिवर्तन ल्याउन सक्षम बनाएको छ । हामीले एक हजार महिला व्यवसायीहरुलाई तालिम दिने लक्ष्य लिएका थियौँ र सो लक्ष्य पूरा भएको छ । अझै धेरै महिलाहरुलाई सशक्तीकरण गर्दै जानेछौं ।
त्यस्तै बोट्लर्स नेपालका पब्लिक अफेयर, कम्युनिकेसन र सस्टेनिबिलिटी डिरेक्टर स्नेह राजभण्डारीले नेपालमा महिला उद्यमशीलता एक कदम अगाडि बढेको तर्क गरे । उनले भने, ‘काठमाडौं उपत्यका बाहिर विशेष गरी धेरै खुद्रा पसलहरु र रेस्टुरेन्टहरु छन जुन महिलाले चलाउँछन् ।'
त्यस्ता महिलाहरुलाई आइपर्न सक्ने चुनौतीको सामना गर्न सक्षम बनाउने उद्देश्यले कोका–कोलाले सक्षम जस्ता तालिम कार्यक्रमहरु सञ्चालन गर्दै आइरहेको छ जसले महिलाहरुलाई आफ्नो व्यापार अगाडि बढाउन हौसला दिन्छ । आफ्नो व्यवसायलाई कसरी विस्तार गर्न सकिन्छ भन्ने बारेमा पनि सक्षमले महिला व्यवसायीहरुलाई नयाँँ तरिकाले सोच्न सिकाउँछ ।
सन् २०१० मा कोका–कोलाले विश्वव्यापी रूपमा फाइभ बाइ ट्वेन्टि (५ बाई २० ) सञ्चालन गरेको थियो जसअन्तर्गत कम्पनीले सन् २०२० सम्म ५० लाख महिलालाई आर्थिक रूपमा सक्षम बनाउने लक्ष्य लिएको थियो । त्यस्तै नेपालमा पनि गत ६ वर्षदेखि स्टार (सप किपर ट्रेनिङ रिसोर्सेस) सञ्चालन गर्दै आइरहेको छ । जसअन्तर्गत ५ हजार ८ सय जना खुद्रा व्यवसाय सञ्चालन गर्ने महिलालाई तालिम दिइसकेको कम्पनीले जनाएको छ ।
-1732541848.jpg)
