लेखनाथ। पाेखरामा यती एयरलाइन्सकाे जहाज दुर्घटनाग्रस्त भएकाे छ। पाइलट कमल केसीले आफू गएर बस्ती जाेगाएका छन्। जहाज दुर्घटनाका कारण प्रत्यक्षदर्शीहरू आतिएका थिए।
बिहान ११ बजे घरकाे आँगनमा घाम तापिरहेका बबरजंग गुरूङ भन्छन् 'कुर्सीमा बसिरहेकाे थिएँ, एक्कासि जहाज घरको छत छुने गरी उत्तरबाट कोल्टिँदै आयो, हेर्दाहेर्दै घरको एक सय मिटर पूर्व सेती डिलको बाँस घारीमा गएर ठूलो आवाजमा बजारियो, जहाजको एक टुक्रा म बसिरहेको कुर्ची नजिकै आएर बजारियो।'
यस्तै दुर्घटना जीवमा पहिलाे पटक देखेखा उनले भने 'आँखै अगाडि यस्तो दुर्घटना कहिल्यै देखेको थिएन।' जहाज दुर्घटना स्थलदेखि एक सय मिटर पश्चिम स्यालदुले निवासी ८७ वर्षीय गुरुङले 'जहाज बजारिएपछि आगोको मुस्लोसहित धुवाँले गाउँ ढाक्यो, केही समयपछि पुलिस र आर्मी आइपुगे, मसँगसँगै परिवार र छिमेकी ठूलो कालले बाच्यौँ भनेर घरभित्र पस्यौँ तर आगो फैलिन्छ कि भन्ने डर बढ्न थाल्यो। पछि जहाजमा लागेको आगो नियन्त्रणमा आयो,' उनले भने।
सेती खोँचको पूर्वी भागमा डिलको बाँसको थानमा बजारिएको जहाजका केही टुक्रा सेती खोँच वारि, केही टुक्रा पारि र केही टुक्रा खोँचमा खसेका थिए। शवहरु केही डिलमा अड्किएको भए पनि अधिकांश सेती खोँचमा नै खसेका थिए।
आज बिहान पोखरा अन्तर्राष्ट्रिय विमानस्थल नजिकै नयाँ गाउँको खोँचमा जहाज दुर्घटना भयाे। जहाजमा ६८ यात्रु र चारजना चालक दलका सदस्यसहित ७२ जना सवार थिए। दुर्घटनाग्रस्त ९ एन–एएनसी जहाज पोखरा अन्तर्राष्ट्रिय विमानस्थलमा अवतरण गर्ने क्रममा पुरानो र नयाँ विमानस्थलबीचको नयाँगाउँस्थित सेतीको खोँचमा दुर्घटनामा परेको थियो।
दुर्घटनास्थल नजिकै नयाँगाउँ निवासी विष्णुहरि सापकोटाले भने, 'उत्तरतर्फ काहूँ डाँडातर्फबाट पुरानो विमानस्थलमा आज जहाज आयो भनियो। तर, जहाज पुरानो विमानस्थलबाट पश्चिम मोडेर नयाँ विमानस्थलमा लाने क्रममा एक्कासि ढलपल ढलपल हुँदै सेती नदीको खोँच डिलको बाँसको थानमा छुन पुग्यो। अनि ठूलो आवाजसहित भुईमा खस्यो। हामी दौडेर त्यहाँ पुग्दा आगोको मुस्लोसहित धुवाँ आइरहेको थियो,' उनले भने।
'दुर्घटनास्थलमा जान सक्ने अवस्था थिएन। केही समयपछि आएका सुरक्षाकर्मीले पानीको फोहोराले आगो निभाउने प्रयास गरे, केही समयपछि आगो नियन्त्रणमा आएको भए पनि सेती खोँचमा रहेको लास जलेको गन्ध आइतबार दिनभरि आइनै रहेको छ,' स्थानीय सापकोटा भन्छन्। सेती खोँचको पूर्वी भागका एक दर्जन घर विमानचालकले बचाएर सेती खोँचमा खसालेको अनुमान स्थानीय प्रीती गुरुङकाे छ।
अर्का प्रत्यक्षदर्शी स्थानीय मनिषा परियारले भनिन्, 'हामी त घाम तापेर बसिरहेका थियौँ, जहाज कोल्टे–कोल्टे हुँदै आयो, के भएछ भनेर हेरियो, त्यसको एकैछिनमा जहाज गति गुमाउँदै भूइँमा खस्यो, बचाउ बचाउ भन्ने आवाज सुनियो, अनि त हामी झनै आत्तियौँ।'
विमान कोल्टे परेको दुईतीन मिनेटमै सेतीको खोँचमा ठोक्किएको उनले जानकारी दिइन्। विमान खोँचमा खसेकाले बस्ती जोगिएको उनको भनाइ छ। 'कोल्टे कोल्टे हुँदै वारि ठोकिएर पारि जोतिन पुग्यो, अनि आगो बल्न सुरु भइहाल्यो,' मनिषाले भनिन्, 'धन्न हाम्रै घरमाथि खसेन जहाजको क्षति त हुन्थ्यो नै हाम्रो पनि बिचल्ली हुन्थ्यो।'
आगो बल्न थालेपछि बाल्टीमा पानी लिएर गए पनि उद्दार गर्न नसकेको उनले बताइन्। केही स्थानीयले प्रहरीलाई खबर गरे पनि जलिरहेको जहाज हेर्नुभन्दा अर्को उपाय नभएको उनको भनाइ थियो। 'एकै छिनमा आगो बल्न सुरु भयो। हामीले बाल्टीमा पानी बोकेर त गयौँ तर त्यसले के हुन्थ्यो ?' उनले भनिन्, 'कसैले प्रहरीलाई फोन गर्न तिर लाग्यौँ। केही छिनमा बोरिङको ट्याङ्कर पनि आयो त्यसपछि दमकल, एम्बुलेन्स, प्रहरी, आर्मी सबै आए। अनि बल्ल हामीलाई बाँच्नेहरु बाँच्छन् कि भन्ने भयो।'
दुर्घटनामा पर्ने यतीको उक्त जहाज पोखराको अन्तर्राष्ट्रिय विमानस्थलमा पहिलोपटक अवतरण गर्ने जहाज थियो। उक्त जहाजलाई यती एयरलाइन्सका वरिष्ठ क्याप्टेन कमल केसीले उडाएका थिए। क्याप्टेन केसी प्रशिक्षक पाइलट पनि हुन्। यही जहाजबाट पोखरा अन्तर्राष्ट्रिय विमानस्थलमा पहिलो ‘डेमो’ उडान गरेका थिए। नेपालमा ७२ यात्रु क्षमताको एटिआर जहाज दुर्घटना भएको यो पहिलो घटना भएको बताइएको छ।
उक्त जहाजमा चालक दलका सदस्यहरू कमल केसी, अन्जु खतिवडा सृजना होंगचुन र ओसिन आले मगर थिए। जहाजमा नेपाली ५३, भारतीय नागरिक पाँच, रसियन चार, आयरल्यान्डका एक, अस्ट्रेलियन एक, अर्जेन्टिनी एक, कोरियन दुई, फ्रान्सेली एक गरी ६८ यात्रु र चालक दलका चार सदस्य थिए। जहाज खोँचमा परेकाहरूकाले उद्धारमा कठिनाइ आएको उद्दारमा खटिएका सुरक्षाकर्मी बताउँछन्। रासस
-1732541848.jpg)
