काठमाडौं । साना उद्यमीलाई प्रोत्साहन गर्दै आएको मुक्तिनाथ विकास बैंकले कफी व्यवसाय सञ्चालन गर्न चाहनेलाई व्यावसायिक कर्जा दिने भएको छ।
कफीसम्बन्धी व्यवसाय सञ्चालन गर्न इच्छुक व्यक्तिहरूले कफी मेसिन खरिद गर्नका लागि मुक्तिनाथ विकास बैंकबाट बिनाधितो कर्जा पाउने भएका छन् । कफी मेसिनको लागतमा ५० प्रतिशत ऋण रकम बिनाधितो पाइने भएको हो ।
कफी व्यवसायसम्बन्धी तालिम दिई व्यवसायी बनाउँदै आएको काठमाडौँ पुतलीसडकमा रहेको कफी सोलुसन प्रालि र मुक्तिनाथ विकास बैंकबीच कफी व्यवसाय सञ्चालन गर्न चाहने व्यक्तिहरूलाई व्यावसायिक कर्जा प्रवाह गर्ने सम्बन्धमा सम्झौता भएको हो ।
साे सम्झौताअनुसार कफी सोलुसन प्रालिले कफीसम्बन्धी व्यवसाय सञ्चालन गर्न इच्छुक व्यक्तिहरूलाई छनौट गरी आवश्यक तालिमहरू दिई सक्षम बनाई सशुल्क कफी मेसिन उपलब्ध गराउने छ ।
कफी मेसिनको लागतको ५० प्रतिशतसम्मको लागत बराबरको रकम व्यवसायीलाई बिनाधितो ऋण स्वरुप मुक्तिनाथ विकास बैंकले उपलब्ध गराउनेछ । ऋण लिएर व्यवसाय सुरु गरी त्यही व्यवसायबाट आर्जन गरेको रकमले व्यवसायीले बैंकलाई मासिक रूपमा किस्ता तिर्न मिल्ने व्यवस्था गरेको छ ।
यो कार्यबाट साना वर्गका व्यवसायीहरुको दैनिक जीविकोपार्जन हुनुको साथै स्वरोजगार सिर्जनामा सहयोग पुग्ने र भविष्यमा ठूला व्यवसायीको रूपमा रूपान्तरित भई उद्यमशीलता विकासका साथै अर्थतन्त्रमा नै सकारात्मक प्रभाव पार्न सक्ने अपेक्षा लिइएको बैंकका प्रमुख कार्यकारी अधिकृत प्रद्युम्न पोखरेलले बताए ।
कफी सोलुसन प्रालिका निर्देशक हरि रायमाझीले मुक्तिनाथ विकास बैंकले न्यून आय भएका वर्गका व्यक्तिहरूलाई प्राथमिकता दिई आय आर्जन वृद्धि गर्ने कार्यमा महत्त्वपूर्ण भूमिका खेलेको प्रति खुसी व्यक्त गरे ।
विगत डेढ दशकदेखि सहर तथा ग्रामीण क्षेत्रमा बैंकिङ सेवा प्रदान गर्दै आएको मुक्तिनाथ विकास बैंकले लघुवित्त कार्यक्रम मार्फत सहर तथा ग्रामीण भेगमा रहेका कम आय भएका महिला तथा उद्यमी व्यक्तिहरूलाई प्राथमिकतामा राखी घरघरमा कर्जा बचतको कारोबार गर्दै उद्यमशीलता विकासमा योगदान दिँदै आएको छ ।
यसै सन्दर्भमा कफीको गेडा छान्ने, पिँध्ने, प्याकिङ गर्ने, कफीजन्य पदार्थ उत्पादन गर्ने, बेकरी उत्पादनको क्रियाकलाप गर्ने, आयातसम्बन्धी क्रियाकलाप गर्ने र दैनिक जीविकोपार्जनमा कठिन भएका व्यक्तिहरूलाई कफी व्यवसायसम्बन्धी तालिम दिई व्यवसायी बनाउँदै आएको काठमाडौं पुतलीसडकमा अवस्थित कफी सोलुसन प्रालि र मुक्तिनाथ विकास बैंकबीच एक कार्यक्रम माझ कफी व्यवसाय सञ्चालन गर्न चाहने व्यक्तिहरूलाई व्यावसायिक कर्जा प्रवाह गर्ने सम्बन्धमा सम्झौता भएको हो ।
बैंकले डिजिटल कारोबारलाई प्रोत्साहन गर्न सो बैंकको एटीएम कार्ड प्रयोग गरी नेपालभरि रहेको भिसा नेटवर्कमा आबद्ध अन्य जुनसुकै बैंकको एटीएम मेसिनबाट निःशुल्क रकम झिक्न सकिने व्यवस्था गरेको छ ।
त्यसैगरी प्रिपेड डलर कार्ड, मोबाइल बैंकिङ, क्यूआर कोड, अनलाइन कर्जा आवेदन, अनलाइन खाता खोल्ने, इन्टरनेट बैंकिङ, खातामै रेमिट्यान्स जम्मा तथा मिस्डकल बैंकिङ जस्ता सेवाहरू बैंकको शाखामा भौतिक रूपमा उपस्थित नभई घरबाटै उपयोग गर्न सकिने व्यवस्था गरेको छ ।
