नवलपरासी। प्रधानमन्त्री तथा नेपाली कांग्रेसका सभापति शेरबहादुर देउवाले नवलपरासीको समग्र विकासका लागि विनोद चौधरीलाई विजय गराउन आग्रह गरेका छन्। नवलपरासी विकासमा धेरै पछि परेको र जिल्लाको विकासका लागि चौधरीलाई पठाइएको देउवाले बताएका हुन्।
पश्चिम नवलपरासीको क्षेत्र नम्बर १ मा आयोजित लोकतान्त्रिक बाम गठबन्धनले आयोजना गरेको चुनावी सभालाई सम्बोधन गर्दै प्रधानमन्त्री देउवाले नेकपा एमालेलाई जनताले दिएको अभिमत केपी ओलीले बीचमा नै घाटी निमोठेको भन्दै अब लोकतान्त्रिक गठबन्धनलाई अत्याधिक बहुमतले विजय गराएर लोकतन्त्र र संविधानको रक्षा गर्न आग्रह गरे।
संसद विघटन नगर्ने र जनताले दिएको अभिमत पुणर्रुपमा पालना गर्ने पार्टीलाई विजय गराउन पनि उनले मतदातालाई आग्रह गरे। चौधरीको जितले यस क्षेत्रको विकासको ढोका खुल्ने भन्दै देउवाले नवलपरासी पश्चिमका मतदातालाई भने, 'तपाईंहरू विनोद चौधरीलाई जिताएर पठाउनुस्, हामी उहाँमार्फत यस जिल्लामा विकास पठाउछौ।'
चुनावी सभामा बोल्दै माओवादी केन्द्रका अध्यक्ष प्रचण्डले आगामी मंसीर ४ गतेको चुनाव पाण्डव र कौरबबीचको महाभारत युद्ध जस्तै भएकाले जनताले पाण्डवको पक्षमा मतदान गर्न आग्रह गरे।
‘मंसीर ४ मा जनताले कौरब र पाण्डव मध्ये एक रोज्नुपर्ने अवस्था छ। जनताको अभिमतको अवमूल्यन गर्ने कौरवको पराजय निश्चित छ।’ उनले भने, ‘मतदाताले लोकतान्त्रिक बाम गठबन्धनको पाचं पाण्डवहरुका उम्मेदवारलाई विजय गराउने छन्।’
कार्यक्रममा बोल्दै प्रचण्डले विनोद चौधरीको विजयले यस क्षेत्रको विकासमा कोषेढुंगा सावित हुने बताए। 'चौधरीको उम्मेदवारी तपाईं आम मतदाताको सुनिश्चित भविष्य हो, विजय गराउनुहोस् अरू हामीले गर्छौ,' उनले भने।
सोही कार्यक्रममा कांग्रेस केन्द्रीय सदस्य तथा क्षेत्र नम्बर १ का उमेदवार विनोद चौधरीले आफूले यस क्षेत्रका जनताले भोगेको मल, बीउ, डुबान तथा वेरोजगारीको समस्यालाई योजनाबद्धरूपमा समस्या समाधान गर्ने प्रतिबद्धता व्यक्त गरेका थिए। २५ वर्षसम्म रोकिएको विकासलाई अब गति दिने उनले बताए।
