दोधारा चाँदनी। कञ्चनपुरको बेदकोट नगरपालिका–७ का विष्णु जोशीलाई दोधारा चाँदनीमा सुक्खा बन्दरगाह बन्ने र दैजीको छेलामा औद्योगिक क्षेत्र स्थापना हुने सुनेको दशकभन्दा बढी भइसक्यो।
रोजगारीको सिलसिलामा भारतमा रहेका उनी यसपटक मतदान गरेर फर्किने तयारीमा छन्। 'गएको चुनावमा औद्योगिक क्षेत्र बन्छ यहीँ रोजगारी पाइन्छ भनेर उत्साही भएर भोट हाले', उनले भने, 'भारतमा काम गर्ने बेला नेपालका नेताको समाचार सुन्दा दिक्क लाग्थ्यो।'
उनले निर्वाचनको बेला मात्रै विकासका आश्वासन दिने र पछि काम नगर्ने प्रवृत्तिले दलप्रति वितृष्णा जागेको बताए। 'हामीले धेरै चुनावमा आश्वासन पायाैं अब हामीलाई विकास चाहियो,' उनले भने, 'यसपटक पनि आश्वासन धेरै पाइएको छ, हेरौँ के गर्छन्।'
अहिले पनि यहाँका उम्मेदवारले दैजी छेलामा औद्योगिक क्षेत्र स्थापना गर्ने, दोधारा चाँदनीमा सुख्खा बन्दरगाह निमार्ण गर्ने र महाकाली करिडोर निर्माण गरी कञ्चनपुरलाई त्रिदेशीय नाकाका रूपमा विकास गर्ने चुनावी मुद्दा बनाएका छन्।
दोधारा चाँदनी नगरपालिका–८ का इन्दा सुनारलाई दोधारा चाँदनीको कञ्जभोजमा सुक्खा बन्दरगाको कुरा सुनेको करिब सात वर्ष भयो। 'अघिल्लो निर्वाचनका बेला यहाँ सुक्खा बन्दरगाह बन्छ, रोजगारी पाइन्छ भन्थे,' उनले भनिन्, 'अहिले पनि उम्मेदवारले त्यही आश्वासन मात्रै दिने गरेका छन।'
उनले उपचारका लागि दोधारा चाँदनीमै अस्पताल हुनुपर्ने बताइन्। 'हामीलाई उपचार गर्न धेरै समस्या पर्छ यहाँ सुविधा सम्पन्न अस्पताल छैन,' उनले भनिन्, 'हामीलाई ,बिजुली, खानेपानी र अस्पताल चाहियो।'
उनले यसपटक पनि गाउँमा सुविधा नभए अर्को पटक मतदान नगर्ने बताइन्। भीमदत्त नगरपालिका–९ का रामनाथलाई महाकाली करिडोर घरआँगनमै पुग्छ भन्ने सुनेको करिब दशक भइसक्यो।
'महाकाली करिडोर बन्छ मात्रै भन्छन तर बन्ने कहिले हो ?,' उनले आक्रोसित हुँदै भनिन्, 'हाम्रो पालामा त त्यस्तै हो नातिको पालामा बन्ला।' उनले विकास कुरा धेरै सुनेको तर काम कहीँ नभएको बताइन्। उनी यसपटक मतदान नगर्ने मनस्थितिमा छन्।
मंसिर ४ गते हुने प्रतिनिधिसभा तथा प्रदेशसभा निर्वाचनमा उम्मेदवारले महाकाली करिडोर, दोधारा चाँदनीमा सुक्खा बन्दरगा र दैजीछेला औद्योगिक क्षेत्रको मुद्दा प्राथमिकताका साथ उठाएका छन्। निर्वाचनको मिति नजिकिँदै गर्दा उम्मेदवार मतदातालाई आश्वस्त पार्न व्यस्त छन्।
