काठमाडाैं। नेपालमा समेत छायाँकन भएको भारतीय फिल्म ‘उचाई’ ले नेपाली पर्यटनलाई प्रवर्द्धनमा सहयोग गर्ने भएको छ।
अमिताभ बच्चन, अनुपम खेर, बोमन इरानी र डेनी डेन्जोङ्पा, परीनिती चोपडा, नीना गुप्ता, सारिका हसनजस्ता दिग्गज कलाकारको अभिनय रहेको फिल्म ‘उचाई’ आउँदो शुक्रबारदेखि प्रदर्शन हुँदैछ।
नेपालकै पात्रलाई मूलकथा बनाइएको फिल्म छायाँकन गर्न दुई सयको हाराहारीमा प्राविधिक भारतबाट आएका थिए। त्यसमा नेपाली प्राविधिक तथा कलाकारले समेत सहभागी भएर काम गरे। बलिउडमा स्थापनाको ७५औँ वर्ष पूरा गरेको राजश्री प्रोडक्सनको निर्माण रहेको फिल्मलाई सुरज बडजात्याले निर्देशन गरेका छन्।
नेपालमा स्वयम्भू, काठमाडौं विमानस्थल, लुक्ला, नाम्चे, मनाङमा झन्डै एक महिना छायाँकन भएको थियो। नेपालमा लाइन प्रोड्युसर सुरज आचार्यको कम्पनि थ्री ह्विलर्सले र प्रोडक्सन कोर्डिनेटर अरूण रेग्मीले व्यवस्थापन गरेका थिए।
'उहाँहरूसँग काम गर्दा नेपाली प्राविधिकले समेत सिक्न पाएँ। उहाँहरूको काम गर्ने शैली परिपक्व छ,' प्रोडक्सन कोर्डिनेटर रेग्मीले भे, 'दिग्गज कलाकारहरूको कामप्रतिको सरलता र मानवीय स्वभावले हामीलाई काम गर्न ऊर्जा प्रदान गथ्र्यो। निर्देशकले नेपाली दृश्य खिच्नलाई कुनै सम्झौता गर्नुभएन।'
छायाँकन टोलीमा भारतीय टोलीमा एक सय ५५ जना सदस्य र नेपालीतर्फ कलाकारबाहेक छायाँकनमा ३० देखि ३५ जना नेपाली प्राविधिक खटिरहे। टोलीका लागि ६०/६५ गाडीको प्रयोग चौबिसै घण्टा रहन्थ्यो।
लाइन प्रोड्युसर आचार्यका अनुसार छायाँकनको दौरान लगभग तीन सयको हाराहारीमा हेलिकप्टर उडान गरिएको थियो। 'हामीले फाप्लो–लुक्ला, लुक्ला–नाम्चे, नाम्चे–एबिसी, कालापत्थर, कालापत्थर–काठमाडौं, काठमाडौं–मनाङको यात्रा हेलीबाटै गरेका थियौं,' उनले भने।
उचाईको छायाँकन भएपश्चात् केही सिरिज तथा फिल्महरू नेपालमा छायाँकन हुन् आएका छन्। 'सरकारका तर्फबाट केही सेवासुविधा पाए छायाँकनमा आउने संख्या बढ्छ जस्तो लाग्छ। कानुनी अड्चनसँगै विविध समस्याहरू छन्। यद्यपि, उचाई प्रदर्शन भएपछि अन्य प्रोडक्सन हाउसलाई नेपालले लोभ्याउनेमा विश्वत छु,' प्रोडक्सन कोर्डिनेटर रेग्मीले भने। डेनी डेन्जोङ्पा सोलुखुम्बुवासीको भूमिकामा छन्। उनले आफ्ना बुढ्यौलीको साथीहरू अमिताभ, अनुपम र बोमनलाई नेपाल ल्याउने प्रयास गरेता पनि त्यो सफल हुँदैन।
डेन्जोङ्पाको निधनपश्चात् उनको अस्तुलाई नेपालमा विसर्जन गर्ने अठोट लिएर बाँकी तीन नेपाल आउने कथा फिल्ममा छ। नेपाली गाइड परिणिती चोपडाले उनीहरूलाई हिमाल पुर्याउने र घुमाउने भूमिका निर्वाह गरेकी छन्। यात्रामा यी तीन साथीहरू आउने आरोह अवरोह नै मूल कथा हो।
