तनहुँ । जिल्लाको व्यास नगरपालिका–१० स्थित पीजनहिलदेखि व्यास–५ चिन्तुटारसम्म करिब पाँच सय मिटर लामो जिपलाइन निर्माण गरिएको छ । मादी नदीमाथि जिपलाइन निर्माण गरी सञ्चालनमा ल्याएसँगै साहसिक जिपलाइनमा रम्ने आन्तरिक पर्यटकको दैनिक भीड लाग्न थालेको छ ।
बिदाका दिन होस् या अन्य दिन जिपलाइनको मज्जा लिन विभिन्न जिल्लाबाट आन्तरिक पर्यटक आउने गरेका छन् । प्रमुख जिल्ला अधिकारी विश्वप्रकाश अर्याल पनि परिवारसहित उक्त स्थानमा पुगे । आफूलाई यस्ता साहसिक खेलप्रति रुचि भएकाले बिदाको समय मिलाएर खेलको मनोरञ्जन लिन आएको उनले बताए ।
यसअघि प्याराग्लाइडिङ गरिसकेको बताउँदै प्रजिअ अर्यालले सहजै खेलमा भाग लिई मनोरञ्जन लिएपछि भने, “सुरक्षित तरिकाले बनाइएकाले खासै डराउनुपर्दैन् । यस्ता खेलले जिल्लाको पर्यटन प्रबर्द्धनमा थप टेवा पुग्छ ।”
त्यसैगरी गोरखादेखि आउनुभएकी सुविना भण्डारीले जीपलाइनको यात्रा मनोरञ्जन हुने भएकाले दोस्रो पटक खेलमा सहभागी हुन आएको बताए । पहिलो पटक चितवनमा रहेको जिपलाइनमा सहभागी भए पनि त्यहाँको भन्दा यहाँको लामो भएकोले थप अनुभव लिन आएको उनले बताए ।
यही कात्तिक ३ गतेदेखि जिपलाइन सञ्चालनमा ल्याइएको सञ्चालक विवेक सापकोटाको भनाइ थियो । भारतको दिल्लीस्थित द एड्भेन्चर प्लान्टले रु एक करोड दश लाखको लागतमा ठेक्का सम्झौता गरी उक्त जीपलाइन निर्माण गरेको हो ।
उनले भने, “करिब पाँच महिनाको अवधिमा सबै जडान कार्य सम्पन्न भएपछि जिपलाइन सञ्चालनमा ल्याइएको हो ।” जीपलाइन सञ्चालन भएदेखि हालसम्म २ सय ५० जना साहसिक खेलमा सहभागी भइसकेको सञ्चालक साप्कोटाले बताए।
जिपलाइनमा १ हजार ५ सय शुल्कमा खाजासेट र अन्य रमणीय दृश्यवलोकनसमेत हेर्न पाइने गरी व्यवस्था मिलाइएको छ । एक पटकमा एकै पटक दुई जनासम्मले खेलमा सहभागी हुन सक्ने छन् ।
सुरु स्टेसनबाट मादी नदीका साथै रमणीय डाँडा, फाँटको मनोरञ्जन लिँदै ल्याण्ड स्टेसन करिब ४५ सेकेण्डमा पार गर्न सकिन्छ । ल्याण्ड स्टेसनबाट पैदलमा करिब पाँच/सात मिनेटमा पुनः वारिको स्टेसनमा आउन सकिन्छ ।
