कञ्चनपुर। कञ्चनपुरको लालझाडी गाउँपालिका–३ का लक्ष्मण चौधरी बुधबार साँझ गड्डाचौकी नाकामा भेटिए। दसैं तिहार मनाउन गाउँ फर्किएका उनी चाडपर्व सकिएपछि पुनःकामको खोजीमा भारतको बद्रीनाथतर्फ लागेका हुन्।
चौधरीसँगै बेलौरी र लालझाडीका १७ युवा रोजगारीका लागि भारत लागेका हुन्। आगामी मंसिर ४ गते हुने निर्वाचनका लागि भोट माग्न दलका उम्मेदवार मतदाताको घरदैलोमा गइरहेका छन्। यता गड्डाचौकी नाकाबाट थुप्रै युवा रोजगारीका लागि भारत जाने क्रम बढेको छ।
गड्डाचौकी नाकामा पछिल्लो केही दिनयता कामका लागि भारत जानेको संख्या बढेको छ। 'चुनाव आएर हामीलाई के नै हुन्छ र नेताहरू भोट मागेपछि फर्किदैनन्।' रोजगारीको खोजीमा भारत जान लागेका चौधरीले भने, 'हामीलाई त भारत नगई सुख छैन, नत्र परिवार कसरी पाल्ने।' उनले चुनावमा मात्रै आश्वासन दिने नेताले स्वदेशमै रोजगारीको व्यवस्था गर्न नसक्दा भारत जानुपर्ने बाध्यता रहेको बताए।
'आफ्नै ठाउँमा रोजगारी पाएको भए किन भारत जानुपथ्र्यो र,' उनले भने, 'भारत नगई खानपीनको जोहो गर्न सकिँदैन।'
आर्थिक अवस्था कमजोर भएकाले पढाइ छाडेर रोजगारीका लागि भारत जान लागेका चौधरीले त्यहाँ लामो समयदेखि मजदुरी गर्दै आएका छन्। 'भारतको बद्रीनाथमा हाम्रो गाउँका २५/३० जना मजदुरी गछाैं,' उनले भने, 'चाडपर्व मनाएर फेरि भारत जान लागेका छौं, भोट हाल्न मन त थियो बाध्यताले दिएन।'
चौधरीसँगै कामको खोजीमा जान लागेका बेलौरी नगरपालिका–५ का धर्मा चौधरी पनि स्वदेशमा रोजगारीको सिर्जना नहुँदा भारतको भर पर्नु परेको बताउँछन्।
'त्यहाँ गएर मजदुरी गर्न साह्रै दुःख हुन्छ, तर जानै पर्ने बाध्यता छ,' उनले भने, 'अहिले पनि नेताहरू रोजगारी दिन्छौं भनेर गाउँमा भोट माग्दै छन, हेरौं यसपालि के गर्छन्।' नेता अहिले गाउँमा भोट माग्न आउँदा आफूका लागि स्वदेशमै रोजगारीको व्यवस्था गर्न माग गरेको बताए।
जिल्ला प्रहरी कार्यालय कञ्चनपुरका अनुसार तिहार सकिएपछि रोजगारीका लागि भारत जानेको संख्या बढेको छ। प्रहरीको तथ्यांकअनुसार मंगलबार ८९ जना रोजगारीका लागि भारत गएका छन्। बुधबार सो संख्या बढेर एक सय ८० पुगेको छ। रासस
