काठमाडाैं । कलिंग साहित्य महोत्सवको दोश्रो दिन आज (आइतबार) विभिन्न २४ वटा सत्रमा संचालन भएको छ। दोश्रो दिन नेपाली, हिन्दी र अंग्रेजी भाषामा कविता वाचन सत्रमा विभिन्न कविले आफ्नो प्रस्तुति दिए ।
कार्यक्रममा सूर्यको पाइलाहरू शीर्षकमा नेपालका प्रसिद्ध कविहरूले कविता वाचन गरेका थिए भने हिन्दी साहित्यका प्रखर कवि अशोक वाजपेयीसहित अन्य कविहरूले कविता वाचन गरेका थिए।
त्यस्तै उज्यालो तिर शीर्षकमा नेपाली र अंग्रेजी कविता वाचन सत्र सम्पन्न भएको थियो। आजको सत्रमा विशेषगरी कला, साहित्य र सामाजिक विषयवस्तु मिश्रित शीर्षकमा विभिन्न वक्ताहरूले आफ्नो धारणा व्यक्त गरेका थिए । 
'महिला आध्यात्मिक गुरुहरू: तिनीहरूको महत्त्व', 'डिजिटल युगमा प्रकाशन: नयाँ सम्भावनाहरू नयाँ चुनौतीहरू', 'लेखनमा क्षेत्रीयताको महत्व र आवश्यकता,' 'भारतीय रहस्यवादी परम्परामा नेपालको पुनस् भ्रमण,' 'महिला लेखन: चुनौती र भविष्य', 'भारत-नेपाल सम्बन्ध सुदृढ पार्न मिडियाको भूमिका', 'अध्यात्म, संस्कृति, साहित्य: नेपाल र भारतको जोड्ने बिन्दु', 'समाज, साहित्य र सिनेमा', 'नेपाली समीक्षकहरूको वर्तमान अवस्था' र 'भारत-नेपाल कला परम्परा (चित्रकला, ढुङ्गा कला, सम्पदा, समकालीन कलाको ऐतिहासिक संस्मरण' जस्ता शीर्षकमा यस क्षेत्रसँग आबद्ध व्यक्तित्वहरूले विभिन्न आयामबाट छलफल गरेका थिए ।
नेपाली भोजपुरी भाषा र साहित्यको वर्तमानस्थिति शीर्षकको सत्रमा भाग लिएका भोजपुरी साहित्यका प्रखर साहित्यकारहरूले भोजपुरी भाषाको उत्थान र सम्बर्धनको महत्व र भोजपुरी साहित्यको प्रचार प्रसारका बारे प्रकाश पारेका थिए ।
डेनमार्कका लागि नेपालका पूर्व राजदूत विजयकान्त कर्णको नेपालका लागि पूर्व भारतीय राजदूत रञ्जित रायसँगको कुराकानीमा निकै रोचक रहेको थियो। दुई पूर्व कुटनीतिज्ञ नेपाल र भारतबीचको सम्बन्ध र साथै अहिलेको समकालीन विश्वका घटना र विकासका बारे विस्तृत छलफल भएकाे थियाे। पूर्व राजदुत कर्णले सोधेको एक प्रश्नमा पूर्व राजदूत रे ले आफ्नो व्यवसायिक जीवनमा नेपाल र नेपालीलाई नजीकबाट हेर्न पाएको बताए।
