काठमाडौं। नेपालको इतिहासमै पहिलो नाडा इभी एक्स्पो सुरू भएको छ। एक्स्पाे नेपालमा पहिलो पटक भृकुटीमण्डपमा सुरू भएको हाे।
नाडा अध्यक्ष धुब्र थापाले नेपालमा विद्युतीय सवारीसाधनको अपरिहार्यतालाई महसुस गर्दै नाडा इभी एक्स्पो सुरू गरेकाे जानकारी दिए ।
विद्युतीय सावरी साधनको महत्व बढ्दै गएको बताउँदै अध्यक्ष थापाले प्रदुषण कम गर्ने मात्र नभई विद्युत खपतमा सहयोग पुग्ने उनले बताए। वातावरणमैत्री विद्युतीय सवारी साधनको प्रयोगले पेट्रोलियम पदार्थको खपत कम गर्ने भएकाले ग्रिन नेपालको अवधारणा साकार हुने नाडाको ठहर छ।
सरकारले विद्युतीय सवारीसाधन प्रवर्द्धन गर्ने बताउँदै १०० किलोवाटमाथीका गाडीमा कर बढाउनु उपयुक्त नभएको थापाकाे भनाइ छ। ‘सरकारले १०० किलोवाटमाथीका गाडीमा कर बढाउँदा प्रोत्साहनको सट्टा निरुत्साहन भएको छ,’ अध्यक्ष थापाले अर्थमन्त्रीलाई इंगित गर्दै भने,‘नेपालको भौगलिक अवस्थाअनुसार २०० किलोवाट क्षमतासम्मका गाडीलाई पुरानै व्यवस्थाअनुसार कर कायम गरिदिन अनुरोध गर्दछु।’
सरकारले नेपालमै गाडी एसम्बल गर्न आग्रह गरेपनि त्यसको लागि स्थिर नीति आवश्यक रहेको उनले बताए । अध्यक्ष थापाले सरकारले स्थिर नीति लिए व्यवसायी पार्ट पुर्जाको उद्योगसमेत खोल्न तयार रहेको बताए।
अर्थमन्त्री जनार्दन शर्माले इभी एक्स्पो नाडाको मात्रै नभई देशकै भएको बताए। मन्त्री शर्माले नेपालमा विद्युतीय गाडी प्रवर्द्धन गर्ने सरकारको नीतिबाट पछि नहट्ने बताएका छन्। ‘विद्युतीय गाडीलाई प्रवर्द्धन गर्दै आएका छौं। त्यसबाट पछि हट्दैनौं,’ मन्त्री शर्माले भने,‘अब कोईला, डिजेल, पेट्रोलको युग सकियो अब इभी, हाइड्रोजनतर्फ गैरहेका छौं।’
अर्थमन्त्री शर्माले सरकारले निश्चित अवधिपछि विद्युतीय सवारी चल्ने मात्रै व्यवस्था गर्न लागेको बताएका छन्। पेट्रोलियम पदार्थबाट चल्ने सवारी कहिले रोक्ने भन्ने विषयमा अध्ययन गरिरहेको जानकारी दिए। ‘गाडी उत्पादन यही गर्नुहोस् विद्युत र ब्याजमा थप सहुलियत दिनुपर्छ,’ उनले भने,‘एसेम्बल उद्योगमा भ्यालु एड कसरी गर्न सकिन्छ। त्यसमा ध्यान दिनुस्।’
उद्योग वाणिज्य महासंघका अध्यक्ष शेखर गोल्छाले सरकारको सहुलियतका कारण ३०–३५ लाखमै गाडी पाउने अवस्था रहेको बताएका छन्। अध्यक्ष गोल्छाले सरकारको नीति स्थिर रहनुपर्ने बताउँदै अन्तशुल्क र भन्सार महशुल बढाउन नहुने बताए। वातावरण संरक्षण गर्नको लागि विद्युतिय गाडीलाई प्रोत्साहन गर्नु पर्ने धारण व्यक्त गरे।
नाडा अध्यक्ष थापाले सरकारले गाडी आयातमा प्रतिबन्ध लगाउँदा ९ महिना देखी अटो व्यवसायी मारमा परहेको जानकारी गराए। कार, जिप, भ्यान र १५० सिसि माथीका मोटरसाइकल आयात खुल्ला गर्न अर्थमन्त्रीसंग माग गरेका थिए। अर्थमन्त्री शर्माले सवारी प्रतिबन्ध लामो समय नरहने अर्थमन्त्री शर्माले बताए। उनले अर्थतन्त्र सुधारतर्फ गइरहेको बताउँदै निर्यात वृद्धि गरि आयात खोल्नुपर्ने बताए ।
नाडाले १९९८ देखी नै नाडा अटो शो गर्दै आएको छ। नाडा इभी एक्स्पो पहिलो पटक हुन लागेको छ। नाडा ई भी एक्स्पोका सभापति अनुप बरालले एक्स्पोमा ५१ वटा स्टल रहेको जानकारी दिए। उनका अनुसार नाडा ई भि एक्स्पोमा ९ वटा ४ पाग्रे र १ वटा ३ पाग्रे रहेका छन्। १६ वटा २ पांग्रे सवारीका स्टल रहेका छन्।
गाडी ब्रान्डमा टाटा, हुन्डाई, टेस्ला, नेटा, बीवाईडी, चांगन, ज्यागका चारपांग्रे विद्युतीय गाडीको सहभागिता रहेको छ। अग्नी ग्रुपले ३ पांग्रे टेरो ब्रान्ड सहभागिता हुनेछ।दुई पांग्रे ब्रान्ड रहेका छन्। जसमा लेभ्निङ, एनआईयु, यडिया, ओला, सुपर सोको, हिरो इलेक्ट्रिक, दुहान, जोय, सेगवे, आईमा, टेलजी, पियोर, लेक्ट्रो, रेमोटर्स लगायतका ब्रान्डको उपस्थिती रहेको छ।
चापको व्यवस्थापनको लागि नाडाले खल्ती एपमार्फत टिकट काट्न सकिने व्यवस्था गरेको छ। एक्स्पोमा प्रवेशको लागि विद्यार्थीलाई १५० रुपैयाँ र सर्वसाधारणको लागि २०० रूपैयाँ व्यवस्था गरेको छ।
सिएट द्वारा प्रायोजित नाडा सवारी साधन, पार्ट पूर्जा, वित्तिय सेवा उपलब्ध रहेका छन । एक्स्पोको व्यवस्थापन ग्लोबल एक्सपोजिसन एण्ड म्यानेजमेन्ट सर्भिसेजले गरी रहेको छ। नाडाले १० प्रतिशत बजार हिस्सा ओगटी सकेको छ । अबको ५–६ वर्षमा ५० प्रतिशत बढी हिस्सा हुने आंकलन गरिएको छ।
नेपाली चाड–पर्वहरुको पूर्वाधारमा आयोजना हुन गइरहेको यस एक्स्पोले नेपालमा विद्युतीय सवारी साधनबारे अत्याधिक जनचेतना अभिवृद्धि गर्न एवं सम्बन्धित सम्पर्ण अटो व्यवसायीहरुको समस्टिगत प्रवर्द्धनमा प्रत्यक्ष तथा सकारात्मक प्रभाव पार्ने नाडाको विश्वास छ।
नाडाले विद्युतीय गाडीको एक्स्पो मात्रै नभई विद्युतीय गाडीको जानकारी दिन ३ दिन ई भी चौतारी समेतको आयोजना गर्दैछ। शुक्रबारको गोष्ठीमा प्रविधि र इको सिस्टमको विषयमा छलफल हुँदै छ।
जसमा वन तथा वातावरण सचिव प्रेम नारायण कँडेल रहने छन् भने यातायात व्यवस्था विभागका रामचन्द्र पौडेल, अनुसन्धान कर्ता शिर्पा श्रेष्ठ, अभियान्त्रिकी कर्मशालाका सिईओ अभिशेक कार्की, सिप्रदिका दिनेश पौडेल र नेपाल विद्युत प्राधिकरणका सागर ज्ञवाली प्यानलिस्ट रहेका छन्।
युएसएड क्लिन एयरको सहयोगमा भईरहेको ईभी चौतारीमा भुषण तुलाधर मोडरेट रहेका छन । नाडाको पहलमा आजबाट प्रदर्शनी स्थल भृकुटीमण्डपमा रक्त्दान कार्यक्रम समेत सञ्चालन हुदैछ ।
