काठमाडौं । दैनिक उपभोग्य वस्तुको आपूर्ति, उत्पादन र बजारीकरण गर्दै आएको साल्ट ट्रेडिङ कर्पोरेसन लिमिटेडले तोरीको तेलको उत्पादन गर्ने भएको छ । दसैँ अघिदेखि हेटौँडास्थित नेपाल वनस्पति उद्योगबाट शुद्ध तोरीको तेल उत्पादन गरी बजारमा ल्याइने कर्पोरेसनले जनाएको छ ।
तोरीको तेल उत्पादन गरेसँगै स्थानीयस्तरमा उत्पादित तोरीको खपत बढ्ने र उपभोक्ताले सुपथ मूल्यमा गुणस्तरीय तोरीको तेलको उपभोग गर्न पाउने कर्पोरेशनका विभागीय प्रबन्धक बज्रेशकुमार झाले बताए ।
कर्पोरेसनले अहिले आयोडिनयुक्त नुन, एसटिसी ब्राण्डको खाना पकाउने ग्यास, चामल, गेडागुडी, स्थानीय उत्पादनलाई प्याकिङगरी उपभोक्तामाझ पुर्याउँदै आएको छ । पछिल्लो पाँच वर्षयता कर्पोरेशनको कारोवार निरन्तर बढिरहेको छ ।
आर्थिक वर्ष २०७३/७४ मा कर्पोरेसनले ८ अर्ब ५८ करोड रुपैयाँको उपभोग्य वस्तुको बिक्री गरेको थियो । आव २०७४/७५ मा ९ अर्ब ६८ करोड रुपैयाँ, आव २०७५/७६ मा ८ अर्ब २५ करोड रुपैयाँ, आव २०७६/७७ मा ९अर्ब ७४ करोड रुपैयाँ र आर्थिक वर्ष २०७७/७८ मा १० अर्ब ३९ करोड रुपैयाँको उपभोग्य वस्तु बिक्री गरिएको कर्पोरेशनका अध्यक्ष कल्याण गोविन्द श्रेष्ठले जानकारी दिए।
गुणस्तरीय सेवा र उत्पादनका कारण पछिल्लो समय कारोबार बढ्दै गएको उनको भनाइ छ । बिक्री बढेसँगै कर्पोरेसनले वित्तीय अवस्थामा सुधार गर्दै लगेको छ । कर्पोरेसनले आव २०७७/७८ मा मात्रै पाँच करोड ३३ लाख सञ्चालन नाफा आर्जन गरेको छ । गत आवको कारोवार एकीकृतगर्ने क्रममा रहेको कर्पोरेसनका विभागीय प्रबन्धक झाले बताए ।
कर्पोरेसन ६०औं वर्षमा
सरकार र निजी क्षेत्रको सहभागितामा सञ्चालित कर्पोरेसन आजदेखि ६०औं वर्षमा प्रवेश गरेको छ । विसं २०२० भदौ २७ गते सरकारले कर्पोरेसनको स्थापना गरेको थियो । तत्कालीन समयमा जनतालाई सहजरुपमा नून उपलब्ध गराउन स्थापना गरिएको कर्पोरेसनले पछिल्ला दिनमा व्यापारमा विविधीकरण गर्दै लगेको छ । कर्पोरेसनले पछिल्ला समय स्थानीय उत्पादनको बजारीकरणमा जोड दिँदै आएको छ ।
६०औं वार्षिकोत्सवका अवसरमा आज आयोजित कार्यक्रममा कर्पोरेसनका प्रमुख कार्यकारी अधिकृत उर्मिला श्रेष्ठले साल्ट ट्रेडिङलाई नमुना संस्था बनाउने उद्देश्यका साथ आफूहरुले काम गरिरहेको बताए ।
आफ्नो सेवालाई थप प्रभावकारी बनाउन योजनाबद्ध हिसावले देशरभका डिलरमार्फत उपभोक्ताको माझमा पुगिरहेको उहाँको भनाइ छ । सो अवसरमा एसइई परीक्षामा उत्कृष्ट अंक ल्याउने कर्पोरेशनमा कार्यरत कर्मचारीका सन्ततिलाई दुई वर्षसम्म मासिक ३ हजार रुपैयाँका दरले छात्रवृत्ति प्रदान गरिएको थियो ।
