इस्लामबाद । पाकिस्तानमा बाढीबाट प्रभावित ४७ हजार भन्दा बढी गर्भवती महिलाहरू सिन्ध प्रान्तको आश्रय शिविरहरूमा बस्न बाध्य छन् । स्थानीय सञ्चारमाध्यमले प्रान्तीय स्वास्थ्यमन्त्रीलाई उद्धृत गर्दै आइतबार सो तथ्यांक सार्वजनिक गरेका हुन् ।
सिन्धका स्वास्थ्यमन्त्री अजरा पेचुहोले बाढीबाट प्रभावित महिलाको तथ्यांक सार्वजनिक गरेकी हुन् । उनले बाढीपहिरोपछि लाखौं मानिस विभिन्न रोगबाट ग्रसित भएको बताएकी छन् । सो प्रान्तमा १ लाख ३४ हजार भन्दा बढी झाडापखाला र ४४ हजार मलेरियाका घटनाहरू रिपोर्ट गरिएको छ ।
गत अगस्ट ३० मा संयुक्त राष्ट्र संङीय जनसंख्या कोष, यौन तथा प्रजनन स्वास्थ्य निकायले बाढी प्रभावित क्षेत्रमा कम्तीमा ६ लाख ५० हजार गर्भवती महिलाहरू रहेको र जसमध्ये ७३ हजार जना यस महिनामा सुत्केरी हुन लागेको जनाएको छ।
बाढीपीडितहरूमध्ये हालसम्म एक लाखभन्दा बढी चर्म रोगबाट पीडित छन् भने १ सय भन्दा बढी सर्पदंश र ५ सय भन्दा बढी कुकुरको टोकाइबाट पीडित भएको डन अखबारले उल्लेख गरेको छ ।
संयुक्त राष्ट्रसंघ एजेन्सीले महिला र केटीहरू लैङ्गिक आधारित हिंसाको बढ्दो जोखिममा रहन सक्ने चेतावनी जारी गरेको छ । किनकि बाढीबाट करिब १० लाख घरहरू क्षतिग्रस्त भएका छन् र विस्थापित परिवार सुरक्षित आश्रयस्थलको खोजीमा छन् ।
पाकिस्तानले यस वर्ष अभूतपूर्व बाढीको सामना गरेको छ जसले देशका करिब तीन करोड तीस लाख मानिसहरूलाई असर गरेको छ भने दशौं हजार मानिसहरूलाई विस्थापित गरेको छ।
स्वास्थ्य अधिकारीहरूले शनिबार जारी गरेको प्रतिवेदनअनुसार विगत दुई महिनामा सिन्धबाट १ लाख ३४ हजारभन्दा बढी झाडापखालाका घटनाहरू रिपोर्ट गरिएका छन्।
त्यस्तै यस वर्षको जुनदेखि हालसम्म ४४ हजार ८३२ औलोका बिरामी फेला परेको तथ्यांकले देखाएको छ । रासस/एएनआई
