मनाङ । हिमाली जिल्ला मनाङमा नयाँ उद्योग थपिने क्रममा छन् । आर्थिक वर्ष २०७८/७९ मा जिल्लामा ४९ नयाँ उद्योग थपिएका छन् । थपिएका यस्ता अधिकांश उद्योग कृषि तथा वन पैदावरमा आधारित छन् ।
एक वर्षका अवधिमा जिल्लामा ३१ कृषि तथा वन पैदावरमा आधारित नयाँ उद्योग थपिएको घरेलु तथा साना उद्योग कार्यालय मनाङका प्रमुख ऋषिराम पौडेलले जानकारी दिए । उनका अनुसार जिल्लामा १७ पर्यटन उद्योग र सेवामूलक उद्योग एउटा थपिएको छ ।
हाल मनाङवासी निजी उद्योग दर्तातर्फ आकर्षित भएको पाइएको उनले बताए। सो अवधिमा जिल्लामा ३६ जिल्ला निजी उद्योग दर्ता भएका छन् भने साझेदारी उद्योग १३ दर्ता भएको उनले बताए। जिल्लामा ५३ उद्योगको नवीकरण, पाँच उद्योगको नामसारी, ६ उद्योगको पुँजी वृद्धि, तीन उद्योगको नाम परिवर्तन, दुई वटाको लगतकट्टा र ६ उद्योगको प्रतिलिपि बनाइएको उनले जानकारी दिए। वाणिज्यतर्फ ५ नयाँ दर्ता, सात नवीकरण, दुई नामसारी, तीनको पुँजी वृद्धि, एकको नाम परिवर्तन, एकको प्रतिलिपि, एकको लगतकट्टा गरिएको छ ।
आर्थिक वर्ष २०७८/७९ मा जिल्लामा उद्योगतर्फ कुल ४ सय ८५ र वाणिज्यतर्फ कुल ९३ सञ्चालनमा रहेको घरेलु कार्यालयले जनाएको छ । आर्थिक वर्ष २०७७/७८ मा उद्योगतर्फ कुल ४ सय ३६ र वाणिज्यतर्फ कुल ८८ सञ्चालनमा रहेका थिए । घरेलु कार्यालयले आर्थिक वर्ष २०७८/७९ मा उद्योगतर्फ ३ लाख ८ हजार १ हजार ५० राजश्व संकलन गरेको छ । त्यस्तै सोही अवधिमा वाणिज्यतर्फ १९ हजार ८ सय २५ रूपैयाँ राजश्व संकलन गरेको छ । अन्यबाट २ हजार ८ सय २० रूपैयाँ गरी कुल ३ लाख ३० हजार ७ सय ९५ रूपैयाँ राजश्व संकलन भएको प्रमुख पौडेलले बताए।
“यस आर्थिक वर्षमा जिल्लामा विभिन्न तालिम तथा प्रविधि हस्तान्तरण पनि गरिएको छ,” कार्यालय प्रमुख पौडेलले भने । उद्योगलाई टिकाउ बनाउन विभिन्न तालिमका साथै प्रविधिको उपयोगलाई प्राथमिकता दिन सञ्चालकलाई सचेत गराउने र उद्योगलाई सक्रिय बनाइरहन प्रोत्साहनसमेत गर्ने गरिएको उनले जानकारी दिए ।
सोही अवधिमा उद्यमशीलता विकास, अचार बनाउने तालिम, आधारभूत बेकरी निर्माण, आधारभूत हाते बुनाइ तथा पत्रकारिता तालिम लगायतका विभिन्न तालिमका साथै प्रविधि हस्तान्तरणसमेत गरिएको कार्यालयले जनाएको छ ।
-1732541848.jpg)
