काठमाडौं । नेपाल व्यापार संघले व्यावसायिक कर समान गर्न नवनिर्वाचित जनप्रतिनिलाई आग्रह गरेको छ ।
संघले आइतबार साँझ आयोजना गरेको काठमाडौं महानगरपालिका १७, २२, २४, २५ र २७ का नवनिर्वाचित जनप्रतिनिधिलाई ‘बधाई तथा स्वागत कार्यक्रम’ मा व्यवसायीले पार्किङदेखि घर भाडामा देखिएको समस्या समाधान गर्न आग्रह गरेका हुन् ।
कार्यक्रममा काठमाडौं महानगरपालिका–२२ का वडाध्यक्ष चीनकाजी महर्जनले न्युरोड क्षेत्रमा देखिएका व्यवसायीको समस्या समाधान गर्न जनप्रतिनिधिको सधैं साथ र समर्थन रहने बताए । 'जनप्रतिनिधि र व्यवसायी मिल्ने हो भने न्युरोड क्षेत्रको अधिकांश समस्या समाधान हुन्छ', उनले भने ।
अध्यक्ष महर्जनले आफ्नो वडाले व्यवसायीबाट वार्षिक १२ करोड रुपैयाँभन्दा बढी रकम राजस्व उठाउने गरेको बताउँदै यस क्षेत्रको समस्या समाधानका लागि पनि वडाले खर्च गर्ने प्रतिबद्धता व्यक्त गर्दै आफूहरू जनताको शासक नभएर सेवक बन्न चाहेकाे पनि उल्लेख गरे । साथै व्यवसायीका समस्या समाधानका लागि बेलाबेलामा जनप्रतिनिधिलाई खबरदारी गर्नसमेत आग्रह गरे ।
न्युरोड क्षेत्रको पार्किङको समस्या समाधानका लागि वडा कार्यालय लागिरहेको उनको भनाइ थियो ।
काठमाडौं महानगरपालिका–२५ का वडाध्यक्ष राजेश डंगाेलले व्यवसायीको लगानीको सुरक्षा गर्न स्थानीय सरकार कटिबद्ध भएर लाग्ने बताउँदै व्यवसायीको इच्छा र चाहनाअनुसार आफूहरुले सेवा प्रदान गर्ने बताए ।
यस्तै २७ का वडाध्यक्ष योगेशकुमार खड्गीले आफूहरूले कार्यपालिका बैठकमा काठमाडौंको पार्किङ, घरभाडालगायतका व्यवसायीको समस्याको बारेमा आवाज उठाइसकेको बताए । उनले बजारलाई सुरक्षित बनाउनका लागि आवश्यक पर्ने सीसीटिभी जडानलाई वडाले विशेष प्राथमिकता दिने उल्लेख गरे ।
संघका अध्यक्ष कुमार कार्कीले न्युरोड क्षेत्रमा व्यवसायी र घरबेटीबीच भाडा, बिजुली, ढल, बिजुली तथा इन्टरनेटको तारलगायतको समस्या रहेको जनाउँदै उक्त समस्या समाधानका लागि स्थानीय सरकारलाई आग्रह गरे । उनले मल्लकालीन व्यापारिक केन्द्र न्यूरोड क्षेत्रमा पार्किङको ठूलो समस्या रहेको भन्दै पार्किङलाई व्यवस्थित गर्नुपर्ने, पार्किङ शुल्क घटाउनुपर्ने, व्यावसायिक कर सबै वडामा समान गर्नुपर्नेलगायतका माग राखे ।
संघका संस्थापक अध्यक्ष रुवयनाथ कोइराला, उपाध्यक्ष गिरिराज पोखरेल, महासचिव कृष्ण अधिकारीलगायतले न्युरोड क्षेत्रको समस्या समाधानका लागि व्यवसायी र स्थानीय सरकार मिलेर अगाडि बढ्नुपर्ने धारणा राखेका थिए ।
विसं २०४७ मा स्थापना भएको संघमा दुई हजारभन्दा बढी व्यवसायी आबद्ध छन् ।
-1732541848.jpg)
