मनाङ । हिमाली जिल्ला मनाङको चामे गाउँपालिकाले आगामी आर्थिक वर्ष २०७९/८० का लागि ३१ करोड ३७ लाख ७४ हजार रुपैयाँको बजेट विनियोजन गरेको छ ।
बसपार्क र उद्योगग्राम निर्माणसहितको पूर्वाधार निर्माणलाई प्राथमिकतामा राखेर गाउँपालिकाका उपाध्यक्ष मिङमार ढोमा लामाले बजेट सार्वजनिक गरेका छन् ।
गाउँपालिकाले चालू खर्चतर्फ १० करोड १४ लाख ९७ हजार रुपैयाँ विनियोजन गरेको छ । पुँजीगत खर्चतर्फ २१ करोड २२ लाख ७७ हजार रुपैयाँ विनियोजन गरिएको छ ।
चालू खर्चमा संघ सरकारबाट राजस्व बाँडफाँटतर्फ ४ करोड ३७ लाख ९९ हजार, ससर्त अनुदानतर्फ ५ करोड ४४ लाख विनियोजन भएको छ । चालू खर्चमा प्रदेश सरकारबाट राजस्व बाँडफाँटतर्फ ६ लाख ४८ हजार, गाउँपालिकाको आन्तरिक आयतर्फ २६ लाख ५० हजार रुपैयाँ विनियोजन भएकाे हाे ।
पुँजीगत खर्चमा संघीय सरकारबाट समानीकरण अनुदानतर्फ ७ करोड १३ लाख, सशर्त अनुदानतर्फ २ करोड ७० लाख, समपुरक अनुदान (विपद् व्यवस्थापन) तर्फ मर्स्याङ्दी नदी र ठाडो खोलामा (तटबन्ध) तर्फ १ करोड ७० लाख, अन्य अनुदानतर्फ २ करोड ९६ लाख ५७ हजार रुपैयाँ विनियोजन गरिएको छ ।
संघ सरकारकाले अन्य अनुदानको रूपमा मनाङको सदरमुकाम चामेमा बसपार्क निर्माण र उद्योगग्राम निर्माण गर्ने लक्ष्य लिएको छ । प्रदेश सरकारबाट समानीकरण अनुदानतर्फ ४२ लाख ५७ हजार, विशेष अनुदानतर्फ ७० लाख, समपूरक अनुदानतर्फ ५० लाख रुपैयाँ विनियोजन गरिएको छ ।
प्रदेश सकारबाट विनियोजित विशेष अनुदानमार्फत लोकप्रिय माध्यमिक विद्यालयको छात्रावास भवन निर्माण र समपूरक अनुदानमार्फत थानचोक स्वास्थ्य चौकी निर्माण गरिनेछ । गतवर्ष मर्स्याङ्दी नदीमा आएको बाढीले उक्त विद्यालय र स्वास्थ्य चौकीमा क्षति पुर्याएकोले मर्मतका लागि बजेट विनियोजन गरिएको हो ।
आन्तरिक आय (गत वर्षर्का मौज्दात) ४ करोड ५० लाख ६३ हजार रुपैयाँ रहेको छ । गाउँपालिकाका अध्यक्ष लोकेन्द्रबहादुर घलेले चामे बजारमा खानेपानी विस्तार र ढल निकास आयोजना साझेदारी कार्यक्रमलाई प्राथमिकता दिइएको बताए । उनले चामेमा विद्युत् आयोजना निर्माण, स्यार्कु शीत भण्डार निर्माण, प्रकोप व्यवस्थापन तथा उद्दार कोष र कृषि, पशु क्षेत्रमा विकास तथा विस्तार लगायतका कार्यक्रम गाउँपालिकाले समेटेको पनि बताए ।
आवासीय विद्यालय सञ्चालन, दिवाखाजा कार्यक्रम, शिक्षा, स्वास्थ्य, खेलकुद, सीपमूलक तालिम, लघु उद्यम विकास कार्यक्रम, विद्युत् कुलोदेखि स्याउबारीसम्म तटबन्ध, बस्ती संरक्षण, कजिन सारा ताल पर्यटकीय भ्रमण, संगठन तथा व्यवस्थापन सर्वेक्षण लगायतका योजनालाई गाउँपालिकाले गौरवको योजनाका रुपमा प्राथमिकतामा राखेको छ ।
