दाङ । लामो समय राजनीति गरेका पूर्वमन्त्री लोकेन्द्र विष्ट केही वर्षयता कृषि खेतीमा रमाइरहेका छन् । उनले लगाउएकाे ‘ड्रागन फ्रुट’ अहिले फस्टाउँदै गइरहेको छ । ‘सूर्यमुखी’ झै सूर्यतिर फर्किएका ड्रागन फूल हेरेर उनी खुसी छन् ।
'राति फूलको कोपिला लाग्दा बिहान फूल आउँछ भन्ने थाहा पाएँ', उनले भने, 'यही भएर बिहान खुसीका साथ सबेरै उठ्दा फूलेका ड्रागनका फूल देखेर निकै खुसी भएँ ।'
ड्रागन फ्रुटलाई रातको रानी भनेर पनि चिनिन्छ । किनकि राति नै ड्रागन फ्रुट फुल्ने गर्छ । त्यो फूल लामो समय रहँदैन । सोमबार बिहान फुलेको त्यो फूल मंगलबार बिहानसम्म ओइलिसक्छ । यो वर्ष विगतका वर्षभन्दा बढी नै फूलेको छ । जहाँ फल लागेको हुन्छ, त्यहाँ फूल फुल्ने गर्छ ।
अहिले विष्टले दुई प्रकारका ड्रागन फ्रुट रोपेका छन् । उनले सबैभन्दा धेरै ‘रातोमा सेतो’ वाला रोपेका छन् भने त्यही फार्ममा ‘रातोमा रातो’ ड्रागन फ्रुट पनि रोपेका छन् ।
रातोमा सेतो जातले फल दिन थालेको यो तेस्रो वर्ष हो । तेस्रो वर्षको यो दोस्रो लट हो । साथै ‘रातोमा रातो’ जातले फल दिन थालेको यो दोस्रो वर्ष हो । प्रत्येक वर्ष जेठदेखि कात्तिकसम्म फल दिने गर्छ । यस बीचमा ६ लटसम्म वर्षमा फल प्राप्त हुने विष्टको भनाइ छ ।
विष्टले बर्सेनि फल दिनेक्रम बढिरहेको बताए । विगतमा ३० क्विन्टलसम्म फल भित्र्याउन सफल भएकामा यसवर्ष ४० क्विन्टलभन्दा बढी भित्र्याउने अपेक्षा छ । 'यस वर्ष प्रत्येक बोटमा १० देखि २० वटासम्म फल फलेका छन्',उनले भने, 'त्यसले गर्दा यस वर्ष विगतभन्दा उत्पादन बढ्ने अपेक्षा छ ।'
प्रत्येक लटमा फूल फुलेका २० दिनसम्ममा फल पाकिसक्छ । एउटा सेतो फल ५०० ग्रामसम्म हुने गर्छ भने रातो फल ३०० ग्रामम्म हुने गरेको उनी बताउँछन् । विष्टले तुलसीपुर उपमहानगरपालिका–१८ विजौरीस्थित खाली जग्गालाई भाडामा लिएर ड्रागन फ्रुट खेती गरेका छन् । त्यही खेतीबाट उनले वार्षिक २० लाखसम्म आम्दानी गर्दै आएका छन् ।
फलबाहेक बिरुवाबाट पनि वार्षिक ५ लाखसम्म आम्दानी हुने गरेको उनकाे भनाइ छ ।
