काठमाडौं । वैदेशिक रोजगार विभागले बैंक ग्यारेन्टी र नगद धरौटी थप गर्न नसकी खारेजीमा परेका सम्पूर्ण म्यानपावर कम्पनीलाई १५ दिनभित्र संस्थाको विगतको दायित्व फरफारक गर्न निर्देशन दिएको छ ।
विभागले आइतबार एक सर्कुलर जारी गर्दै खारेजीमा परेका म्यानपावरले हालसम्म वैदेशिक रोजगारीमा पठाइएका व्यक्तिको सम्पूर्ण विवरण विभागमा पेश गर्न पनि निर्देशन दिएको हो ।
वैदेशिक रोजगार ऐन, २०६४ को संशोधनअनुसार धरौटी वृद्धि गर्न नसकेपछि ३०३ म्यानपावर स्वतः खारेजीमा परेका थिए । सरकारले ऐन संशोधन गरी म्यानपावरको धरौटी २ करोडदेखि छ करोड रुपैयाँसम्म वृद्धि गरेको थियो ।
त्यसैगरी आगामी दिनमा विगतको संस्थाको नामबाट वैदेशिक रोजगारसम्बन्धी नयाँ एवं पूराना कुनै पनि कार्य नगर्न/नगराउन विभागले सूचीत गराएको छ । विभागले व्यक्तिसँग लिएको रहदानी र नगद फिर्ता गर्न पनि ती संस्थालाई निर्देशन दिएको छ ।
त्यस्तै विदेशी रोजगारदाता कम्पनीसँग लिएको मागपत्रबमोजिमको जनशक्ति आपूर्ति गर्न नसक्ने व्यहोरा सम्बन्धित रोजगारदातालाई गराउन, प्रयोगमा ल्याउन नसकिने भएका प्रमाणीकरण गरिएको मागपत्रबारे सम्बन्धित कूटनीतिक नियोगलाई जानकारी दिन पनि आग्रह गरेको छ ।
यसैगरी नयाँ मागपत्र नल्याउन एवं प्रमाणीकरण नगराउन, कार्यालयको नाममा राखिएको बोर्ड हटाउन, कर्मचारीलाई दिएको परिचयपत्र रद्द गर्न, संस्थासँग सम्बन्धित मुद्दा तथा उजुरी तत्काल फरफारक गर्न पनि निर्देशन दिइएको छ । विभागको निर्देशन अटेर गरी विगतमा जस्तै कामकारवाही गरेमा हदैसम्मको कारवाही हुने विभागले जनाएको छ । रासस
