दाङ । संघीय सरकारले प्रस्तुत गरेको आर्थिक वर्ष २०७९/८० को बजेटमा दाङका योजना प्राथमिकतामा परेका छन् ।
आइतबार अर्थमन्त्री जनार्दन शर्माले आगामी आवका लागि संसदमा प्रस्तुत बजेटमा पुरानो टरिगाउँ विमानस्थलको स्तरवृद्धि तथा पहुँचमा विस्तार गर्न बजेट विनियोजन गरिएको जानकारी दिए । उनले टरिगाउँ विमानस्थलसहित डढेलधुरा, बागलुङको बलेवा, टीकापुर, चौरजहारी विमानस्थलकाे स्तरवृद्धि तथा उदयपुर विमानस्थलको निर्माणकार्य सुरु गर्न संयुक्त रूपमा १२ अर्ब २४ करोड रुपैयाँ बजेट विनियोजन गरिएको जानकारी गराएका हुन् ।
त्यस्तै राप्ती राजमार्ग अन्तर्गत अमेलिया– तुलसीपुर, सल्यानहुँदै रुकुमको मुसिकोट र सहिद मार्गअन्तर्गत घोराही–रोल्पा थवाङहुँदै मैकोट जोड्ने सडकका लागि ३ अर्ब रुपैयाँ बजेट विनियोजन भएको छ । देउखुरीको प्रगन्ना र बडकापथ सिँचाइ आयोजनाको मूलनहर विस्तार गर्नसमेत बजेट विनियोजन गरिएको छ ।
त्यसैगरी नेपाल-भारत सीमास्थित दाङको कोइलाबासमा भन्सार कार्यालय सञ्चालनका लागि भौतिक पूर्वाधार निर्माण गर्न पनि बजेटमा प्राथमिकता दिइएको छ । यस्तै बृहत् दाङ उपत्यका सिँचाइ आयोजनाका लागि पनि बजेट विनियोजन गरिएको छ । रोल्पादेखि दाङ डाइर्भसनका लागि सम्भाव्यता अध्ययन गर्न बजेट छुट्याइएको छ । प्युठान, माडीको पानी दाङमा ल्याई त्यसबाट ३५ मेघावाट जलविद्युत् उत्पादन गर्नका लागि समेत बजेट विनियोजन भएको छ ।
त्यस्तै बुटवल–लमही ४०० केभि विद्युत् लाइनकार्य सुरु गर्न पनि बजेटमा व्यवस्था गरिएको छ । यसैबीच लामो समयदेखि अवरुद्ध भई हाल सञ्चालनमा रहेको टरिगाउँ विमानस्थलको स्तरवृद्धिका लागि सरकारले बजेट विनियोजन गरेकोमा यहाँका नागरिक खुसी भएका छन् । उक्त विमानस्थललाई सरकारले बजेट विनियोजन गरेपछि अब विमानस्थलको स्तरवृद्धि हुनेमा आफूहरू ढुक्क भएको स्थानीयवासीकाे भनाइ छ ।
विमानस्थलको स्तरवृद्धि भएसँगै निजी क्षेत्रका ठूला विमानले दैनिक उडान भर्न सुरु गरेपछि आम नागरिकको हवाई सेवामा पहुँच पुग्ने विश्वास छ ।
तुलसीपुर उद्योग वाणिज्य सङघले उक्त विमानस्थलको स्तरवृद्धि गर्न दबाब दिने उद्देश्यले स्वतःस्फूर्त रूपमा आर्थिक संकलन अभियानसमेत सुरु गरी र २ लाखभन्दा बढी रकम संकलन भएको जनाएको छ ।
हाल सो विमानस्थलबाट नेपाल वायुसेवा निगमको जहाजले हप्तामा २ दिन उडान भर्दै आएको छ ।
