काठमाडौं । सामाजिक सुरक्षा कोषले गत जेठ र असार महिनाको योगदानवापतको रकम योगदानकर्ताको खातामा जम्मा गरेको छ । रोजगारदाताका तर्फबाट जम्मा गर्नुपर्ने २० प्रतिशत र योगदानकर्ताका तर्फबाट जम्मा गर्नुपर्ने ११ प्रतिशत रकम योगदानकर्ताको खातामा जम्मा गरिएको हो ।
करिब १ लाख ३० हजार योगदानकर्ताको खातामा रकम जम्मा गरिएको कोषले जनाएको छ । चालु आर्थिक वर्षको बजेटमार्फत कोषमा योगदान गर्ने योगदानकर्ताको जेठ र असार महिनाको योगदानवापतको रकम सरकारका तर्फबाट जम्मा गर्ने घोषणा गरिएको थियो ।
कोरोना महामारीका कारण रोजगारदाता र श्रमिक प्रभावित भएको भन्दै दुई महिनाको योगदान रकम सरकारले नै व्यहोर्ने निर्णय गरेको थियो । सरकारबाट प्राप्त १ अर्ब ६ करोड रुपैयाँ सम्बन्धित योगदानकर्ताको खातामा जम्मा गरिएको छ । कोषले बजेटमा उल्लेख गरेअनुसार योगदानकर्ताको खातामा जम्मा गर्न १ अर्ब ३२ करोड रुपैयाँ माग गरेको थियो ।
हाल जम्मा हुनुपर्ने योगदान रकमको ८४ प्रतिशत जम्मा गरिएको र बाँकी १६ प्रतिशत निकासा प्राप्त भएपछि जम्मा गरिने कोषले जनाएको छ । अपुग रकम छिट्टै निकासा गरिने अर्थ मन्त्रालयबाट जानकारी आएको कोषका प्रवक्ता विवेक पन्थीले जानकारी दिए। पछिल्लो छ महिनामध्ये न्यूनतम रकम जम्मा भएका आधारमा योगदानकर्ताको खातामा रकम जम्मा गरिएको हो ।
यसअघि पनि सरकारले चार महिनाको योगदानवापतको रकम योगदानकर्ताको खातामा जम्मा गरिदिएको थियो । पछिल्लो दुई वर्षको अवधिमा सरकारले दुईपटक गरेर छ महिनाको योगदान रकम योगदानकर्ताको खातामा दाखिला गरिदिएको छ ।
कोषमा हालसम्म १७ हजार ७४ रोजगारदाता र ३ लाख ३२ हजार ९५ योगदानकर्ता सूचीकृत भएका छन् । कोषमा १६ अर्ब ३४ करोड रुपैयाँ योगदान सङ्कलन भएको छ । कोषले विभिन्न सुविधा योजनाअन्तर्गत १ अर्ब १५ करोड ६५ लाख रुपैयाँ दाबी भुक्तानी गरेको छ ।
जसअन्तर्गत औषधोपचार, स्वास्थ्य तथा मातृत्व सुविधावापत १६ करोड ७७ लाख रुपैयाँ, दुर्घटना तथा अशक्तता सुरक्षावापत १ करोड ५६ लाख रुपैयाँ, आश्रित परिवार सुरक्षावापत २ करोड ७५ लाख रुपैयाँ र अवकाश दाबीवापत ९४ करोड ५६ लाख रुपैयाँ दाबी भुक्तानी गरिएको छ । रासस
