काठमाडाैं । मुलुकका सातै प्रदेशमा नेपाली परम्परागत मौलिक खानालाई प्रवर्धन गर्नुपर्ने आवश्यकता औंल्याइएको छ ।
सेफ्स एसाेसिएसन अफ नेपालको २८औं वार्षिकोत्सव एवं राष्ट्रिय सेफ दिवसका अवसरमा आयोजित कार्यक्रममा एसाेसिएसनका अध्यक्ष श्याम लामाले सातै प्रदेशमा यो कार्यक्रम गर्नुपर्नेमा जोड दिएका हुन् ।उनले नेपाली खानालाई अन्तर्राष्ट्रियस्तरसम्म फैलाउन साना होटलदेखि तारे होटलसम्म नेपाली खानाको मेनु राख्नुपर्ने बताए ।
'नेपाली खानालाई विश्वमाझ फैलाउने काम नेपाली सेफकै हो, यसका लागि होटल व्यवसायी र सेफ एकजुट भएर अगाडि बढ्नुपर्छ', अध्यक्ष लामाले भने ।
नेपाली आन्तरिक हवाई उडानमा समेत नेपाली खानाको प्रवर्धन गर्नुपर्ने उनको सुझाव थियो ।
होटल एसाेसिएसन अफ नेपाल (हान) का प्रथम उपाध्यक्ष विनायक शाहले नेपाली परम्परागत एवं मौलिक खानामार्फत पर्यटन प्रवर्धनमा लाग्नका लागि नेपाली सेफहरूको महत्वपूर्ण भूमिका रहेको उल्लेख गरे । यस्तै नेपाली खानालाई देश–विदेशमा पुर्याउन हानसँग सहकार्य गरेर अघि बढ्न चाहेको बताए ।
आलीबाट थालीसम्मका अभियान्ता लक्ष्मणप्रसाद भण्डारीले १२७ प्रकारका खानालाई व्यावसायीकरण गर्नसके मुलुकमा खानामार्फत पर्यटन प्रवर्धन गर्न सकिने बताए ।
विसं २०५३ वैशाख २२ गते स्थापना भएको एससिएसनले २०७२ मा सेफ्स एसाेसिएसन फाउन्डेसन दर्ता गरी होटल तालिम प्रदान गर्दै आइरहेको छ ।
उक्त फाउन्डेसनका कार्यकारी निर्देशक रेशम लामाले हालसम्म ५०० भन्दा बढी विद्यार्थीलाई होटल तालिम प्रदान गरिसकिएको बताए ।
एसाेसिएसनले होटल म्यानेजमेन्ट पढेका विद्यार्थीलाई ‘फुड सेफ्टी’ र कार्यक्षेत्रको सुरक्षासम्बन्धी अल्पकालीन तालिमसमेत प्रदान गर्दै आएको छ ।
एसाेसिएसनका पूर्वअध्यक्ष रत्नबहादुर थापा, गोविन्दनरसिंह केसी, श्रीराम अधिकारी, खड्गविक्रम लामालगायतले सीकेको सीपलाई हस्तान्तरण गर्दै नेपाली होटलमा नेपाली सेफ नै प्रयोग गर्ने वातावरण निर्माणमा एसाेसिएसन लाग्नुपर्नेमा जोड दिए ।
एसाेसिएसनको तथ्यांकअनुसार हाल नेपालका होटलमा ६० प्रतिशत नेपाली र ४० प्रतिशत विदेशी सेफ कार्यरत छन् । कार्यक्रममा सन् २०१५ मा चीनमा सम्पन्न चाइनिज कुजिङ वर्ल्ड च्याम्पियन विजेता सेफ रेशमकुमार लामा तामाङ, पदम आलेमगर, कृष्णकाजी बस्नेत र सुवर्णमान कर्माचार्यलाई सम्मान गरिएको थियो । यस्तै सेफ पेसामा २५ वर्ष पूरा गरेका वरिष्ठ सेफ र एसाेसिएसनका पूर्वअध्यक्षलाई समेत सोही अवसरमा सम्मान गरिएको थियो ।
एसाेसिएसनको स्थापना दिवसका अवसरमा विभिन्न जातजातिका खानालाई समेटेर ‘खाना महोत्सव’ समेत गरिएको थियो ।
