पाेखरा । नेपाली संस्कृतिको संरक्षण र खानाको प्रवर्धन गर्ने उद्देश्यसहित पोखरामा ‘१७ औं फेवा नव वर्ष महोत्सव’ आयोजना हुने भएको छ ।
‘पर्यटन, संस्कृति र खाना’ भन्ने नाराका साथ चैत ३० देखि वैशाख १ गतेसम्म लेकसाइडस्थित फिस्टेल गेटबाट हल्लनचाेकसम्मको मुख्य सडकमा महोत्वसव सञ्चालन हुने आयोजक होटल संघ पोखराले जानकारी दिएको छ ।
कोभिड–१९ महामारीबाट शिथिल बनेको पर्यटन क्षेत्रलाई पुनरुत्थान गर्नका लागि महोत्सव गर्न लागिएको होटल संघका अध्यक्ष एवं महोत्सवका संयोजक लक्ष्मण सुवेदीले बताए ।
कोभिडका कारण गत दुई संस्करणको महोत्सव स्थगनपछि नयाँपनका साथ करिब तीन किलोमिटर खुला सडकमा महोत्सव आयोजना गर्न लागिएको हो । नेपालका मुख्य सहरमा अंग्रजी नयाँ वर्ष धुमधामका साथ मनाउने गरिएकामा नेपाली नयाँ वर्ष पनि उत्तिकै उल्लासका साथ मनाउन यसको प्रचारप्रसार गरी आफ्नो मौलिक संस्कृतिको रक्षा गर्ने महोत्सवको लक्ष्य रहेको छ ।
महोत्सवका अवसरमा अम्बोट र सेन्टर प्वाइटमा स्टेजमार्फत लाइभ म्युजिक, लोकदोहोरी गायन, हाँस्यव्यङ्ग्य प्रस्तुतिसहित विविध सांस्कृतिक कार्यक्रम सञ्चालन गरिने आयोजकले जनाएको छ । महोत्सवलाई भव्य रूपमा सम्पन्न गर्न होटल संघ पोखराका अध्यक्ष सुवेदीको संयोजकत्वमा विभिन्न उपसमिति गठन गरिएको छ ।
महोत्सवको अवसरमा संघले सदस्य होटलहरूको प्रकाशित दररेटमा ३० प्रतिशत छुट दिनेछ । आन्तरिक पर्यटन प्रवर्धन गर्न महोत्सवको प्रचारप्रसारका लागि संघले हालै बुटवल, हेटाैंडा र वीरगञ्जमा ‘आऊँ है पोखरा अभियान’ सञ्चालन गरेको थियो । महोत्सवको अन्नपूर्ण केबलकार प्रालि र गोर्खा ब्रुअरी प्रालिको टुबोर्ग बियर मुख्य प्रायोजक रहेको छ ।
पोखरा पर्यटन परिषद्लगायत अन्य छभन्दा बढी संघसंस्थाले महोत्सवलाई सहयोग गर्नेछन् । महोत्सवको प्रमुख आकर्षणका रूपमा विभिन्न खानाका परिकार, विविध सांस्कृतिक झाँकी प्रस्तुति, ख्यातिप्राप्त कलाकार एवं स्थानीय कलाकारद्वारा प्रत्यक्ष पप कन्सर्ट, दोहोरी आदि प्रस्तुत गरिनेछ ।
कुल ३५ लाख रुपैयाँ खर्च हुने महोत्सवमा १ लाखभन्दा बढी आन्तरिक तथा विदेशी पर्यटकले अवलोकन गर्ने आयोजकको दाबी छ । पत्रकार सम्मेलनमा होटल संघ नेपालका कार्यवाहक अध्यक्ष विनायक शाहले कोभिड त्रासको दुई वर्षपछि पर्यटन क्षेत्र विस्तारै जुर्मुराउँदै गएको र यस्ता मेला महोत्सवले पर्यटक आगमन बढ्ने बताए । यस्तै महोत्सवको उद्देश्य महामारीपछि आन्तरिक र विदेशी पर्यटकलाई स्वागत गर्न पोखरालगायत पर्यटकीय क्षेत्र तयारी अवस्थामा छन् भनेर सन्देश दिन खाेजेकाे उनकाे भनाइ थियाे ।
कार्यवाहक अध्यक्ष शाहले आगामी सिजनका लागि आइरहेको इन्क्वायरी उत्साहवर्धक रहेको र यसले आउने दिनमा पर्यटनका लागि सुखद रहेको सन्देश दिएको उल्लेख गरे ।
अध्यक्ष सुवेदीका अनुसार पोखरामा अहिले पर्यटकदेखि पाँचतारेसम्म गरी एक हजार २०० होटल छन् । ती होटलमा ४० हजार बेड रहेका छन् । निकट भविष्यमै सञ्चालनमा आउन लागेको पोखरा क्षेत्रीय अन्तर्राष्ट्रिय विमानस्थलबाट आउने विदेशी पर्यटकको व्यवस्थानका लागि आवश्यक पूर्वाधार थपिँदै गरेको पनि व्यवसायीको भनाइ छ ।
-1717671934-1732256748.jpg)
