बागलुङ । चैत्राष्टमी (चैतेदसैं) को अवसर पारेर आजदेखि बागलुङमा चैत्राष्टमी मेला सुरु हुँदैछ ।
बागलुङ कालिका भगवती गुठीले मेलाको आयोजना गरेको हो ।
मेलामा विभिन्न खेलकुद तथा सांस्कृतिक कार्यक्रमको आयोजना गरिएको गुठी व्यवस्थापन समितिका अध्यक्ष कुमार खड्काले जानकारी दिए । पर्यटन प्रवर्धन, संस्कृति संरक्षण र परम्पराको निरन्तरता दिन मेला आयोजना गरिएको उनले बताए ।
बागलुङ कालिका मन्दिर परिसरमा पहिल्यैदेखि व्यापार मेलाका रूपमा चैतेदसैं मेला लाग्ने गरेको थियो । कालिका भगवती गुठीले केही वर्षअघिदेखि स्वतःस्फूर्त लाग्ने मेलालाई व्यवस्थापन गर्दै आएको छ ।
यस वर्ष पनि मेलामा भलिबल, राष्ट्रिय लोकदोहोरी, भजन प्रतियोगिता र छेलो फाल्ने प्रतियोगिता आयोजना गरिएको खड्काले बताए । आजदेखि सुरु हुने मेला यही चैत २८ गतेसम्म चल्ने छ ।
मेलामा आयोजना गरिएको भलिबल प्रतियोगिताको गण्डकी प्रदेशका भूमि व्यवस्था कृषि, सहकारी तथा गरिबी निवारणमन्त्री चन्द्रबहादुर बुढा सागरले उद्घाटन गर्ने कार्यक्रम छ ।
मूल समारोहको उद्घाटन भने चैत २६ गते राष्ट्रियसभाका अध्यक्ष गणेशप्रसाद तिमिल्सिनाले गर्ने गुठीले जनाएको छ । ५३ लाख रुपैयाँ खर्च हुने अनुमान गरिएको मेला हेर्न कुनै शुल्क नलाग्ने खड्काकाे भनाइ छ ।
मेलाका लागि कालिका मन्दिर परिसर सिँगारिएको छ । मेलामा झाँकी तथा विविध सांस्कृतिक कार्यक्रम सञ्चालन हुनेछन् ।
-1717671934-1732256748.jpg)
