वालिङ । उद्यमशीलता प्रवर्धनका लागि वालिङ नगरपालिका र संयुक्त राष्ट्र संघीय विकास कार्यक्रम (युएनडिपी) बीच सम्झौता भएको छ ।
उद्यमशीलताको विकास र प्रवर्धन गर्दै नगरवासीलाई उत्पादनमा जोड्नका लागि ती दुई निकायबीच सम्झौता भएको हो ।
दिगो विकास लक्ष्य हासिल गर्न १७ वटा लक्ष्यलाई सन् २०३० सम्ममा संयुक्त राष्ट्र संघले तोकेबमोजिमको उपलब्धि प्राप्त गर्न सो सम्झौता गरिएको नगरप्रमुख दिलीपप्रताप खाँणले बताए । 'यस कार्यक्रबाट गरिबी निवारण, हरित विकास, उद्यमशीलता, नवप्रवर्तनजस्ता कार्यसँगै स्मार्ट सिटीको आधारभूत कार्यमा सहयोग पुग्नेछ', उनले भने, 'विकासको गतिलाई द्रुत रूपमा अघि बढाउँदै तोकिएको समयावधिभित्र उपलब्धि हासिल गर्न महत्वपूर्ण भूमिका निर्वाह गरिने छ ।'
हरित उद्यमशीलताको अभिवृद्धिसँगै सबैलाई समेट्ने क्षमतावान् तथा दिगो विकासको स्थानीयकरण कार्यक्रमले दिगो विकासका लागि महत्वपूर्ण काम गर्ने अपेक्षा उनको थियो ।
कोभिड– १९ को असर कम भएसँगै नागरिकलाई उतपादनसँग जोड्दै स्वरोजगार बनाउने यस परियोजनाको मुख्य लक्ष्य रहेको छ । नगरपालिकासँगको सहकार्य निकै उपलब्धिमूलक रहेको युएनडिपीका सहायक आवासीय प्रतिनिधि विजय सिंहले बताए । उनले अझै प्रभावकारी रूपमा यस कार्यलाई अघि बढाउनका लागि नगरपालिकासँग सम्झौता गरिएको बताउँछन् ।
उद्यमशीलता व्यवसाय प्रवर्धन तथा नवप्रवर्तन केन्द्र (इबिक) स्थापना गरी वालिङले हरित उद्यमशीलताका क्षेत्रमा निकै उदाहरणीय काम गर्न गरेको आवासीय प्रतिनिधि सिंहको भनाइ थियो । यस नगरपालिकाले अघि सारेको उद्यमीको सहर बनाउने अभियानमा सहकार्य गर्न पाउँदा निकै उत्साहित भएको उनले बताए ।
साझेदारी कार्यक्रमअन्तर्गत युएनडिपीले १ करोड १० लाख रुपैयाँ र नगरपालिकाले ३ करोडको व्यहोर्ने भएका छन् ।
-1732541848.jpg)
