दमाैली । नेपाली कांग्रेसका केन्द्रीय सदस्य डा. शेखर कोइरालाले नेपालमा विकासमा अनावश्यक खर्च गरिएको बताएका छन् ।
तनहुँको बन्दीपुर गाउँपालिका–२ स्थित सिमलटार खानेपानी आयोजनाको आज उद्घाटन गर्दै डा.कोइरालाले देशका विभिन्न ठाउँमा भ्यू टावर बनाउने नाममा अनावश्यक खर्च गरिएको भन्दै त्यसमा लगानी गर्ने पैसाले अस्पताल र विद्यालय बनाउनुपर्नेमा जोड दिएका हुन् ।
'विकासका लागि पैसा छैन भन्छौं, भ्यू टावरमा अनावश्यक खर्च गरिरहेका छाैं । मधेसमा जानुभयो सडक सडकमा गेट बनाइराखेका छन्', उनले भने, 'यस्तो काम रोकिनुपर्छ ।'
कांग्रेसका नेता तथा कार्यकर्ताले घोषणापत्र बनाउँदा भ्यू टावर बनाउँदैनौं भनेर प्रतिज्ञा गर्नुपर्ने उल्लेख गर्दै चुनाव नजिकिएका बेला भ्यू टावर बनाउँदा लाग्ने खर्च अस्पताल, विद्यालयमा लगानी गर्छौं भनेर प्रतिबद्धता गरेकाे खण्डमा नेपाली कांग्रेसका लागि फाइदा हुने बताए ।
डा. कोइरालाले तनहुँ सुगम भए पनि मानिस अझै पनि डोकामा पानी लिन जानुपर्ने अवस्था विडम्बना रहेको बताए । 'देश कस्तो अवस्थामा गुज्रिरहेको छ भन्ने यसले देखाएको छ', उनले भने, 'तनहुँमा त यस्तो अवस्था छ भने दुर्गम जिल्लामा के अवस्था होला भनेर बुझ्न जरुरी छ ।'
यस्तै स्थानीय तहको निर्वाचनमा गठबन्धन गरेर जाने सहमति भएको भन्दै कसरी गठबन्धन भन्ने विषय प्रस्ट नभएको उनकाे भनाइ थियाे ।
साथै केन्द्रीय सदस्य गोविन्द भट्टराईले कांग्रेसको नेतृत्वमा जिल्लामा विकास निर्माणको कामले गति लिएको बताए । बन्दीपुरमा खानेपानी, सडक लगायतका योजनामा कांग्रेसको पहल रहेको जनाउँदै विकास गर्ने पार्टी भनेको कांग्रेस रहेको दाबी गरे ।
खानेपानीको अभाव रहेको उक्त क्षेत्रका स्थानीयवासीलाई सहज बनाउन लिफ्टिङ खानेपानी आयोजना निर्माण गरिएको हो । १ करोड ५१ लाख रुपैयाँको लागतमा खानेपानी आयोजना निर्माण सम्पन्न भएको हाे । उक्त आयोजनाबाट २२५ घरधुरी लाभान्वित भएका छन् ।
-1732541848.jpg)
