काठमाडौं । एयरलाइन्स, होटल र रिसोर्ट सञ्चालन गर्दै आएको यती ग्रुपले अब केवलकारमा पनि लगानी विस्तार गर्ने भएको छ ।
ताप्लेजुङको पाथीभरामा दर्शन गर्न जाने पर्यटकलाई लक्षित गरी ग्रुपले पाथीभरा दर्शन केवलकार प्रालिमार्फत निर्माणको तयारी थालेको हो । ग्रुपले विभिन्न कम्पनीहरुसँगको सहकार्यमा सो प्रक्रिया अघि बढाएको हो । केवलकारमा कुन–कुन ग्रुप वा कम्पनी रहने भन्नेबारे अहिले खुलाइएको छैन । यद्यपि लगानीकर्ताहरु भने निश्चित भइसकेका कम्पनीले जनाएको छ ।
करिब ३ अर्ब रुपैयाँमा लगानी निर्माण हुन लागेको सो केवलकार अबको ५ महिनापछि निर्माण कार्य सुरु हुने र २ वर्ष भित्रमा सम्पन्न गरी सञ्चालनमा ल्याउने तयारी भइरहेको कम्पनीका प्रमुख कार्यकारी अधिकृत स्वदेश गुरुङले जानकारी दिए । अहिले केवलकारको लिड उनै गुरुङले गर्दै आएका छन् ।
३ वटा बैंकको लगानी रहने कम्पनीमा अहिले प्रोजेक्ट फाइनान्सका लागि कम्पनीले प्रपोजलमा काम गरिरहेको छ ।
केवलकार निर्माणका लागि ४ दशमलव ९ हेक्टर जमिन लिएको कम्पनीले फुङलिङ नगरपालिका १० फुरुम्बुमा जमिन खरिद गरी आफ्नो नाममा ल्याइसकेको छ ।
१६ वटा गोन्डुलासहितको केवलकारमा प्रतिघण्टा ५ सय जना ओहोरदोहोर गर्न सक्ने कम्पनीले जनाएको छ । सहमतिअनुसार पाथीभरा मन्दिर क्षेत्रमा कुनै संरचना नबनाउने र पहिले बनेको प्रवेशद्वारबाटै यात्रुलाई प्रवेश गराउने योजनामा उल्लेख छ ।
सदरमुकाम फुङलिङबाट २० किलोमिटरको दूरीमा रहेको काफ्लेपार्टीबाट मन्दिरसम्म पैदलयात्रा गर्नुपर्छ । काफ्लेपार्टीबाट मन्दिरसम्म पैदल दूरी ५ किलोमिटर छ । ३ हजार ७ सय ९४ मिटर उचाइमा रहेको पाथीभरामा अहिले वार्षिक ३ लाख तीर्थयात्री पैदल पुग्ने गरेका छन ।
सो ठाउँमा केवलकार निर्माणको चर्चा विगत २३ वर्षदेखि हुँदै आएको छ । २०५४ सालमा पाथीभरा क्षेत्र विकास समितिसँगको सहकार्यमा अध्ययनसमेत भएको थियो । केवलकार फुङलिङ नगरपालिका ११ फावाखोलाको काफ्लेपार्टीदेखि मन्दिरसम्म २.७ किलोमिटर लामो हुनेछ ।
यती ग्रुपले यती एयरलाइन्स, तारा एयर, एयर डाइनेस्टी हेलिकप्टर, थाम्सेर्खु ट्राभल एन्ड ट्रेकिङ एजेन्सीज, गोकर्ण फरेस्ट रिसोर्टसहित देशका विभिन्न भागमा दर्जनभन्दा बढी होटल तथा रिसोर्ट सञ्चालन गरिरहेको छ ।
केही वर्षअघि नै पाथीभरामा केवलकार निर्माण गर्ने योजना बनाएको यती ग्रुपले ३ वर्षअघि मात्र यती ग्रुपका प्रबन्ध निर्देशक आङछिरिङ शेर्पाको सोही ठाउँको अध्ययन गरी फर्कने क्रममा हेलिकप्टर दुर्घटनामा परी मृत्यु भएको थियो । उनीसहित पर्यटन मन्त्री रवीन्द्र अधिकारी तथा उच्च अधिकारीहरुको निधन भएपछि निर्माण प्रक्रिया केही समय पछि धकेलिएको थियो ।
