दार्चुला । सडक सञ्जालसँग नजोडिएको अपि हिमाल गाउँपालिकामा खाद्यान्न अभाव भएको छ । गत वर्षको खडेरीका कारण उत्पादन घटेसँगै यस वर्ष गाउँपालिकामा खाद्यान्न अभाव भएको हो ।
सात हजार जनसंख्या रहेको गाउँपालिकाकाे अधिकांश बस्ती भिरालो पाखो छ । 'पाखो जमिनमा उत्पादन भएको अन्नले ३ महिना पनि खान पुग्दैन', अपि हिमालका स्थानीय प्रेमसिंह कार्कीले भने', 'अहिले उत्पादित अन्न सकिएको छ ।'
गाउँका अधिकांशले महँगो मूल्यमा खाद्यान्न किनेर खानुपर्ने अवस्था आएको छ । गत वर्ष यार्सागुम्बा पनि राम्रो नभएको र गाउँको उत्पादनले नपुगेपछि व्यापारीबाट महँगो मूल्यमा खाद्यान्न खानुपर्दा निकै समस्या भएको उनकाे भनाइ छ । खाद्य संस्थानले चालू आर्थिक वर्षमा खाद्यान्नको कोटा घटाएर पठाउँदा समस्या भएको हो ।
'गत वर्षसम्म २ हजार ५०० देखि ३ हजारसम्म क्विन्टल खाद्यान्न आउँथ्यो', खाद्य संस्थान खण्डेश्वरीका नरभानसिंह ठेकरेले भने', 'यस वर्ष १ हजार क्विन्टल मात्रै खाद्यान्न पठाएपछि समस्या भएको छ ।' पहिले पठाएको १ हजार क्विन्टल खाद्यान्न सकिएको बताइएको छ । गाउँपालिका र जिल्ला प्रशासन कार्यालयमार्फत पहल भएपछि थप ५०० क्विन्टल खाद्यान्न आउने जनाइएको छ । उनले भने', 'यहाँको चामल गहुँको माग अत्यधिक छ । यो चामल एक दिन पनि पुग्नेवाला छैन । खडेरीका कारण यस क्षेत्रमा भोकमरीको अवस्था सिर्जना हुने देखिएको छ ।'
गाउँपालिकाले अपि हिमालका लागि चालू वर्षमा थप ५ हजार क्विन्टल खाद्यान्न कोटा थप्न आग्रह गरे पनि अहिलेसम्म सुनुवाइ नभएको गाउँपालिकाका अध्यक्ष धर्मानन्द मन्यालले बताए । उनका अनुसार २ महिनाअघि नै थप ५ हजार क्विन्टल खाद्यान्न थप गर्न आग्रह भए पनि अहिलेसम्म खाद्य संस्थानको केन्द्रीय कार्यालयबाट जानकारी आएको छैन । यसले गर्दा जनताले खान नपाउने अवस्था भइसकेको छ ।
अहिले अपि हिमालको वडा नं ५ मकरीगाडसम्म मात्रै सडकको ट्र्याक खुलेको छ । त्योभन्दा माथिल्लो क्षेत्रका ४ वडामा सडक पुगेको छैन । सडक नहुँदा यो क्षेत्रमा ढुवानी भाडा महँगो छ । यो क्षेत्रमा व्यापारिक चामल खाद्यान्नको भन्दा निकै महँगो हुने गरेको छ ।
