स्वास्थ्य र पशु बिमामा शतप्रतिशत अनुदान

मुख्य समाचार

गृहपृष्ठ
मुख्य समाचार

स्वास्थ्य र पशु बिमामा शतप्रतिशत अनुदान

क्यापिटल नेपालबिहीबार, माघ १३, २०७८

भक्तपुर । चाँगुनारायण नगरपालिकाको एउटा वडाले आफ्ना नागरिकलाई स्वास्थ्यदेखि पशु बिमासम्ममा शतप्रतिशत अनुदान दिएको छ ।

चाँगुनारायण नगरपालिका–३ झौखेलले आफ्नो नागरिकको स्वास्थ्यमा सहज पहुँच पु¥याउने र पशुपालनमा प्रोत्साहन गर्ने उद्देश्यले यस्तो कार्यक्रम लागू गरेको हो ।

नगरपालिकाले आफ्ना नगरभरिका सबै नागरिकलाई स्वास्थ्य उपचारमा पहुँच पुर्याउन ५० प्रतिशत अनुदान प्रदान गरेको छ । चानपा–३ झौखेलले नगरपालिकाबाट आएको ५० प्रतिशत अनुदानमा अर्को ५० प्रतिशत वडाको अन्य बजेटबाट मिलान गर्दै वडाका सबै नागरिकलाई शतप्रतिशत अनुदान प्रदान गरेको वडाध्यक्ष श्यामसुन्दर धिमालले जानकारी दिए ।

उनले भने,'सबै नागरिकलाई स्वास्थ्य बिमाको पहुँचमा पुर्याएर उपचारमा सहज बनाउने लक्ष्यसाथ २५ लाख रुपैयाँ बजेट विनियोजन गर्दै वडाका ८ सय परिवारलाई शतप्रतिशत अनुदानमा स्वास्थ्य बिमा गराएका हौं।'

त्यसैगरी आफ्ना वडाका सबै नागरिकलाई पशुपालनमा आकर्षित गराउन वडा कार्यालयले पशु बिमामासमेत शतप्रतिशत अनुदान दिएको छ । पशु बिमातर्फ राज्यले ८० प्रतिशत अनुदान दिएको र वडाले २० प्रतिशत थपेर शतप्रतिशत पुर्याएको हो । वडामा अहिलेसम्म २ सय किसान लाभान्वित भएको जानकारी दिँदै वडाध्यक्ष धिमालले गाईभैंसी गरी २ हजार पशुको बिमा गरिएको बताए ।

पशु बिमा गरेका किसानले पशुको मृत्यु भएमा ९० प्रतिशत रकम पाउने र पशुले हानेर किसानको मृत्यु भए ५ लाख रुपैयाँ किसानले पाउने गरी किसानकोसमेत बिमा हुने उनले जानकारी दिए ।